Ил Дархан Айсен Николаев Дьокуускайка «Звезднай» түөлбэҕэ киирэр суол ситимин тутуу бастакы түһүмэҕин түмүктүүргэ сорудахтаата.
Өрөспүүбүлүкэ баһылыга маннык сорудаҕы от ыйын 17 күнүнээҕи Саха сиригэр эбийиэктэри тутуу хаамыытын хонтуруоллуур суһал ыстаап мунньаҕар биэрдэ.
«Инженернэй инфраструктуратын ситимин тардыыга кыра кыһалҕалар баалларынан, суол оҥоруутун бастакы түһүмэҕин ыйыллыбыт болдьоҕор ситэриллибэт куттала баар. Болдьоҕо уларыйара табыллыбат. Бастатан туран, түөлбэҕэ олорор дьон туһунан саныахтаахпыт. Куорат мэрията бэдэрээччиттэри кытта үөскээбит кыһалҕалаах боппуруостары барытын быһаарарга сорудахтаатым», — диэн Айсен Николаев ТГ-ханаалыгар суруйда.
Маны сэргэ мунньах кэмигэр Нерюнгритааҕы киин балыыһа эбийиэктэрин саҥардыы уонна Мииринэйгэ политехническай лиссиэй успуорт саалатын тутуу хаамыытын көрдүлэр. Икки бырайыактарынан үлэ кыраапыгынан баран иһэр. Маны сэргэ Айсен Николаев Нерюнгритааҕы киин балыыһаны мэдиссиинэ оборудованиетынан хааччыйыыны хонтуруолга тутарга уонна Политехническай лиссиэй эбийиэгин быйыл үлэҕэ киллэрии боппуруоһун быһаарарга сорудахтаата.
Хаартыска: куйаар аһаҕас ситимиттэн