Олунньу ый 29 күнүгэр Өлөөн сэлиэнньэтинээҕи А.С.Иванов аатынан «Илкит» этнокултуура Киинигэр Александр Степанович Иванов кэриэһигэр муниципальнай тэрээһиннэр икки ардыларыгар IV Спартакиада үөрүүлээхтик арылынна.
Үөрүүлээх тэрээһин бырааһынньыктыы киэргэтиллибит этнокултуура Киинин уораҕайыгар спортивнай марш доҕуһуолунан муниципальнай тэрээһиннэр сүүмэрдэммит хамаандалара сэлэлээн киириилэринэн саҕаланна. Колонналары муниципальнай нэһилиэктэр аҕа баһылыктара баһылаан-көһүлээн салайан киирдилэр. Ол курдук, Спартакиада үөрүүлээх параадын III спартакиада кыайыылааҕа — Кирбэй национальнай нэһилиэк сүүмэрдэммит хамаандата, аҕа баһылык Владислав Николаев салайааччылаах саҕалаата. Иккиһинэн Дьэлиҥдэ национальнай нэһилиэгин хамаандата, аҕа баһылык Александр Егоров салайааччылаах киирдэ. Салгыы, кый ыраах сытар Солоҕоон национальнай нэһилиэгин сүүмэрдэммит хамаандата, аҕа баһылык солбуйааччыта Андрей Третьяков салалтатынан уонна Өлөөн национальнай нэһилиэгин сүүмэрдэммит хамаандата, аҕа баһылык солбуйааччыта Николай Семенов салалтатынан уруйданан-айхалланан сэлээһини түмүктээтилэр.
Муниципальнай оройуон дьаһалтатын баһылыгын социальнай боппуруостарга солбуйааччы Туйаара Павлова күрэх кылаабынай судьуйата Христофор Христофоровтан А.С.Иванов кэриэһигэр ыытыллар оройуоннааҕы IV Спартакиада кыттыылаахтара күрэххэ бэлэмнэрин туһунан рапорын тутан баран, күрэх кыттыылаахтарын итиитик-истиҥник эҕэрдэлээтэ уонна үрдүк спортивнай көрдөрүүлэри, кыайыыга дьулууру баҕарда.
Нэһилиэктэр хамаандалара бу Спартакиадаҕа түөрт күн устата мас-рестлиҥҥэ, традиционнай оҕунан ытыыга, национальнай многоборьеҕа, хабылык уонна хаамыска остуол оонньууларыгар, гиирэ спордугар, буулдьанан ытыыга, хапсаҕайга күрэхтэһиэхтэрэ.
Николай Стручков.
Вероника Павлова хаартыскаҕа түһэриитэ.