Уонтан тахса сыллааҕыта биир түбэлтэҕэ түбэһэн турабын. Онтубун мэлдьи саныыбын,сороҕор түүлбэр игин араастаан көрөбүн.
Угоян диэн Алдан өрүс нөҥүө турар дэриэбинэттэн,атыыннан дьарыктанар Нина диэн киирбит-тахсыбыт, тахсан да иһэн киирбит,сытыы чүөчэ кэлэн: Бородууктата илдьэн кулу,- диэн көрдөстө.
Күһүн, өрүс мууһа саҥа туран,сырыы саҥа саҕаланан эрэр кэмэ. Өрүс нөҥүө олорор дьон бородуукталара чачыраан, туох да кэллин, барытын имири охсон кэбиһэллэрин Нина кыыс бэрткэ билэр буоллаҕа,атыыннан өр дьарыктаммыт буолан.
Алдаҥҥа баран уоптавайдартан игин тиэннибит,биир чааһынай дьиэттэн халбаһыы ылбыта таһа түүнүктээҕин төптөрү биэрдэ. Малдабааннар быһыылаах. Атын атыыларын тиэйиэхпитигэр диэри, халбаһыыларбытын сууйа охсон төптөрү тиэйдилэр. Мин баспын эрэ быһа илгистэбин.
Уазигым кэнники рессората тиэрэ барыар дылы тиэйдэ. Өссө да тиэйиэх курдугун, батарар һирэ һуох буолан хата,айаммытыгар туруннубут.
Алдантан Угоян 80 килэмиэтир,онтон аҥаара эрэ дэхси суол, ыннараа өттө ким да кыһаллыбат суола,биһиги дьоммут үөрэнэн хаалан туруорсубаттар да быһыылаах, күүстэрэ хайдах тиийэринэн сылдьаахтыыллар. Эбиитин сүүрбэ килэмиэтири өрүһүнэн айанныыгын.
Дьэ,оргууй айаннаан өрүспүтүгэр киирдибит. Суолбутун син тыраахтыр анньыбыт. Мууһунан барар,биэрэккэ тахсар, эмиэ муус устун айанныыбыт. Өрүс сорох сиринэн тоҥмокко сүүрэ сытара көстөр.
Кыраһа түспүтүгэр көрбүтүм ыт суола баар. Суолбут ыт гиэнинээҕэр улаханын дьиксинэ көрдүм. Эмиэ ол диэкки баран иһэр буолан көрөр инибин дии санаатым. Өр өтөр буолбата, биир тоҕой кэнниттэн бөрө айаннаан сиксийэн иһэрин көрдүм.
— Оо! Бөрө!
— Эс! Манна хантан бөрө кэлиэй? Ыт буотта, — Ниинам холку.
— Бөрө-бөрө! — диэт Уазикпын гаазтаан кэбистим. Сэбим өрө хантас гынаат, ыстаннарда. Ол быыһыгар, тоҕо эрэ, жигулёвскай көрбүрээтэрим бэрткэ үлэлээбитин сыаналаан ыллым, бөрөбүн ситэ баттаан ыллым,чугаһаабыппар эрэ эргиллэн көрөн баран,тоҥ хаары логлу тэбээт ыстанна. » Хойут стаартаатыҥ ээ»-,диэн санаа эмиэ элэс гынан ааста уонна үрдүнэн көтүтэн аастым!
Ээ,ол быыһыгар Ниинам хаһыытын истэбин,били :» Ыт буотта»,- дии олорбута ханна да һуох, футбольнай фанаттар илиилэрин өрө уунан баран хаһыытаһалларын курдук, илиитин өрө ууммут, Уазик өһүөтэ төһө биэрэринэн турбута, саарба бэргэһэтэ ханньаччы барбыт, хаһыы да хаһыы:
— Сылаабаа!!! Бөрө! Бөрө!!! Тэбистэр! Тэбистэр!!!
Отой, былыргы утуйа сылдьыбыт эбэҥкитин булчут хаана уһуктан , саалааҕа буоллар ойон тахсыа эбит!
Мин да кини этиитэ суох сахам хаана оргуйан олорор.
Ааһа көтүтээт ааммын аһан көрбүтүм тыыннаах сытар эбит. Кэнникилиир ускуораспын уган иккиһин үрдүнэн бардым,массыынам иҥнэх-иҥнэх гынан тэпсэн ааста.
Бөрөбүт кыратык төбөтүн өндөтөн миигин көрө сытар.
Сиэрэй харахтарыгар ыарыы да суох,өс-саас да суруллубатах. Оргууй миигин тонолуппакка көрө сытар. Уонна тугу гынаҕын? диэбит курдук.
— Сылаабаа! Тахсан добиваайдаа! Добиваайдаа!! — Ниинэм умайыктана олорор.
Толкуйдаан көрбүтүм: монтаажкам, күрдьэҕим барыта бородууктаннан баттана сыталлар.
— Тушёнка баанкатынан добиваайдыыбын дуо? — өс саҕа буоллум.
Таһырдьа тахсыахпын салынным,бөрөм кэтэһэ сытар курдугуттан.
Үсүһүн тэбистэрэн баран, үрдүгэр туран ручнииктаан, кэнсиэрбэннэн да буоллун, добиваайдаан көрүөххэ диэн сананным. Тэбистэрэн баран ручнииктаабытым,Уазик ручнига хаһан үчүгэйдик туппута баарай? Үҥкүрүс гынна.
Массыынам анныгар бөрөм тилигирии түстэ,ойон таҕыста уонна өрүс уҥуорун диэкки сиэлэ турда. Мин маҥнайгы уххаммар кэнниттэн батыһыннараары гыммыппар Ниинам:
— Нохоо,тохтоо! Өрүс ортото сиикэй сытар дии!
Кырдьык даҕаны диэн, уоскуйан бөрөбүн батыһа көрө олордум. Нөҥүө биэрэги булан тохтоон эргиллэн көрдө уонна туох да буолбатаҕын курдук сэксэрэҥнии турда. Бөрө бөҕөтүн көрөн сөҕү диэн сөхтүм. Төһө да буоллар,толору тиэйиилээх Уазик ыйааһын буолуохтаах этэ,үстэ тэбистэриллэн баран тыыннаах барбыта һүрдээх дьыала.
Ол кэнниттэн бөрөм харахтарын бириэмэттэн бириэмэҕэ түһээн көрөр буоллум. Тонолуппакка көрөр да көрөр.
Билигин саалаах да сырыттахпына, ытыам суоҕа диэн мэктиэ тылбын биэрбитим. Айылҕа муударай кыылын хараҕа умнуллубаттыы сүрэхпэр баас буолан иҥэн сылдьар.
Аҕабыытап