Бу дьыл олунньу ый 28 күнүгэр Саха Өрөспүүбүлүкэтин толоруулаах былааһын отчуотун туруорар Бырабыыталыстыба бэрэссэдээтэлин бастакы солбуйааччы Дмитрий Садовников салайааччылаах оробуочай биригээдэ Өлөөн сэлиэнньэтин хаһаайыстыбаннай тэрилтэлэрин үлэлэрин кытта билистэ.
Ол курдук оройуон тыатын хаһаайыстыбатын управлениетын начальнига Анатолий Егоров салалтатынан олохтоох ИП “Алиев Алисафа Таптыг-Оглы” көтөрү иитэр мини-фабрикатыгар сылдьан бүгүҥҥү күннээҕи үлэ туругун билистилэр. Фабрика хаһаайына Алиев оробуочай биригээдэ чилиэннэрин үөрэ-көтө көрсөн, спецтаҥас кэтэрдэн хаһаайыстыбатын билиһиннэрдэ. Билиҥҥи туругунан, хаһаайыстыбата көтөрү иитэрин таһынан 12 төбө барааны иитэн турарын көрдөрдө.
Саха Өрөспүүбүлүкэтин Бырабыыталыстыбатын бэрэссэдээтэлин бастакы солбуйааччы Дмитрий Садовников үлэҕэ-хамнаска туох ыарахаттар баалларын ыйыталаста. Кэпсэтии түмүгэр үлэни оҥорон таһаарар киһиэхэ былаас араас салааларын өттүттэн көмө баар буолуо диэтэ уонна олохтоох оҥорон таһаарыытын сайыннарыыга бэриниилээх үлэтин иһин махталын биллэрдэ.
Салгыы оробуочай биригээдэ Өлөөн сэлиэнньэтигэр тутулла турар СПХТ “Байылыат” (дириэктэр Харабаев В.А.) “Үүт сыаҕын” тутуутун кытта билистэ.
Үүт сыаҕын тутааччы Василий Харабаев билиһиннэрбитинэн сүрүн тутар-монтажтыыр үлэлэр 80,0% толоруллубуттар, сүрүн туруоруллуохтаах оборудование атыылаһыллан аҕалыллыбыт. Билиҥҥи бириэмэҕэ үүт сыаҕын үлэҕэ киллэрэргэ 5,0 мөл. солк. кредитнэй ресурсопредпринимательство Министиэристибэтин хайысхатынан бэриллэригэр үлэлэһэ сылдьалларын кэпсээтэ.
Саха Өрөспүүбүлүкэтин Бырабыыталыстыбатын бэрэссэдээтэлин бастакы солбуйааччы Дмитрий Садовников үүт сыаҕын тутууга кредитнэй ресурса бэриллиитин боппуруоһун түмүк боротокуолга киллэрэн үлэлэһиэх буолла.
Салгыы оробуочай биригээдэ Өлөөн сэлиэнньэтигэр саҥа тутуллан үлэҕэ киллэриллибит “Инкит” ХЭТ (дириэктэр Типянов П.Е.) “Туманнаах” кыбартаалынай хочуолунайыгар сылдьан үлэни-хамнаһы миэстэтигэр СӨ коммунальнай уонна энергетическэй хаһаайыстыбатын миниистирэ Вячеслав Емельянов кыттыылаах билистилэр. “Туманнаах” кыбартаалынай хочуолунай таһыгар ыалдьыттары үөрэ-көтө көрсүбүт Павел Типянов кыбартаалынай хочуолунай ис-тас өттүн көрдөрдө уонна бэдэрээтчит “Армстрой” ХЭТ үлэтинэн астынарын эттэ. Кини коммунальнай хаһаайыстыба салалтатыгар хочуолунай оттугун 2024 сыллааҕы фондата ситэ быһаарыллыбакка турарын билиһиннэрдэ.
Тустаах Министиэристибэ салайааччыта Вячеслав Емельянов туруоруллубут боппуруоһу быһаарыыга үлэлэһиэх буолла.
Сонуннарга анаан Николай Стручков, “Сардаҥа” хаһыат кэрэспэдьиэнэ