Түөрт сыл аннараа өттүгэр Өлөөн оройуонун саамай хоту сытар сиригэр — Дьэлиҥдэ нэһилиэгэр Табаһыт бырааһынньыга ыытыллар күнүгэр, саҥа аныгы тутуулаах уһуйаан дьиэтин үөрүүлээх быһыыга-майгыга арыллыыта буолан ааспыта. Онтон быйыл нэһилиэк төрүттэммитэ 90 сыллаах үбүлүөйүгэр анаммыт табаһыттар бырааһынньыктарын күн «Мин дьолум, тапталым Тугутчаан” диэн кинигэ сүрэхтэниитэ өрөгөйдөөх бэлиэтээһининэн ааста.
Ыытыллыбыт тэрээһин туһунан биһиги хаһыаппытыгар Дьэлиҥдэтээҕи “Тугутчаан” уһуйаан салайааччыта Ольга Павлова сонунун үллэһиннэ:
— Сүлүөт күн, “Тугутчаан” уһуйаан саҥа дьиэтин арыллыытын кэннэ, тиһигэ быстыбат көнө сибээстээх, нэһилиэк көлүөнэтин иитэн таһаарар ийэ-биһигэр аналлаах, киэҥ хабааннаах, 30-ча киһи кыттыылаах кинигэ сүрэхтэниитэ буолла.
Тэрээһиҥҥэ кэлээччилэртэн иһирэх, истиҥ махтал уонна эҕэрдэ тыллара этилиннилэр. Ол курдук, үлэ бэтэрээнэ Спиридонова Анна Христофоровна, баһылык солбуйааччыта Николаева Маргарита Васильевна, бибилитиэкэ үлэһитэ Саввина Наталья Петровна, учуутал Лукинова Лариса Кимовна уонна да атыттар дорҕоонноох эҕэрдэлэринэн, амарах баҕа санаалаарынан мустааччылары кытта үллэстэн кинигэ күн сирин көрбүт кэрэ-бэлиэ түгэнин туоһулаатылар.
Дьэлиҥдэлэртэн биир саамай актыыбынай эдэр ыал Протопоповтар дьиэ-кэргэттэрэ муусука алыптаах эҕэрдэлэринэн салгыы үөрүүлээх күн аартыгын арыйан бардылар. Тэрээһин ирэ-хоро кэпсээтиилээх, урукку көлүөнэ ахтыылардаах буолан ааспытыттан дьон-сэргэ дуоһуйан, астынан тарҕастылар.
Маннык култуурунай тэрээһиннэр кыра нэһилиэк дьонугар улахан сэргэхсийиини, инники хардыыларга улахан күүһү-уоҕу биэрэрэ хайҕабыллаах дьыала буолар. Онон, кинигэ сүрэхтэниитигэр кыһамньыларын уурбут дьоммутугар уонна улууспут баһылыгар Лена Степановна Ивановаҕа истиҥ санаалаах махтал тылларын аныыбыт. Баҕарабыт күннээҕи сыралаах, сылаалаах үлэҕит таһаарыылаах буоларыгар, куруук чэгиэн-чэбдик сылдьыҥ! Кыраттан толлумаҥ, улахантан самнымаҥ!