Өлөөн национальнай нэһилиэгин дьаһалтатын (баһылык Романов В.Н.) уонна кииннэммит библиотека (дириэктэр Николаева Е.В.) көҕүлээһиннэринэн суһал байыаннай эпэрээссийэ кыттыылааҕа, Луганскай норуодунай республикаҕа Саха сирин бэрэстэбиитэлэ Христофоров Филипп Ивановиһы, уоппускаҕа кэлэ сылдьар СВО кыттыылааҕын Артем Романовы уонна хантыраага бүтэн СВО-ҕа сулууспалаан бүппүт Андрей Сергеевы кытта истиҥ көрсүһүү тэриллэн ыытылынна.
Көрсүһүү кыттыылаахтарын элбэх ахсааннаах боппуруостарыгар Филипп Иванович сиһилии быһаарыылары уонна эппиэттэри биэрдэ. Кини суһал байыаннай эпэрээссийэҕа кытта сылдьар биир дойдулаахтарбытыгар сыл сезоннарынан көрөн ичигэс таҥас, маскировочнай накидкалар уонна олохтоох ас-үөл кэлиитэ үөрүүлээх буолуутун бэлиэтээтэ.
Кини оборона министиэристибэтин өттүттэн суһал байыаннай эпэрээссийэ кыттыылаахтарыгар хааччыйыы тупсан иһэрин ыйда.
Көрсүһүү кыттыылаахтара олохтоох бэйэни салайынар тэрээһиннэрэ уонна судаарыстыбаннай былаас өттүттэн суһал байыаннай эпэрээссийэҕэ (СВО) кыттыылаахтарыгар ыытыллар көмөнү тохтоппокко сыл сезоннарынан көрөн гуманитарнай көмөнү хомуйан үлэлэтиини уонна миэстэтигэр тиэрдиигэ үлэлэһэргэ этии киллэрдилэр.
Маны тэҥэ көрсүһүүгэ кыттыыны ылбыт бойобуой дьайыы кыттыылааҕа Андрей Сергеев байыаннай дьайыы усулуобуйатыгар саллааттарга туох ордук күннээҕи олохторугар наада буоларын билиһиннэрдэ.
Суһал байыаннай дьайыы ыытылла турар сиригэр үлэлии-хамсыы сылдьар оройуон бэрэстэбиитэллэрэ Филипп Христофоров бэйэтин түмүк этиитигэр дойдуларын иннигэр ытык иэстэрин толорон байыаннай дьайыыттан демобилизацияланан кэлбит саллааттарга миэстэтигэр реабилитациялааһын боппуруоһунан дьарыктанар наадалааҕын бэлиэтээтэ.
Көрсүһүү кыттыылаахтарын аатыттан кииннэммит библиотека кэлэктиибэ бойобуой дьайыы кыттыылаахтарыгар бэлиэ сувенирдары туттардылар уонна нэһилиэнньэ ортотугар байыаннай-патриотическай хамсааһын саҥа таһымҥа таһаарар бигэ эрэллээх үлэни тэрийэ тарҕастылар.
Николай Стручков