“Сардаҥа” хаһыат редакцията Саха Өрөспүүбүлүкэтигэр спортивнай хамсааһын тэриллибитэ 100 сыллаах уонна Аан дойдутааҕы Азия оҕолорун спортивнай оонньууларыгар бэлэмнэнии күргүөмнээхтик бара турар бириэмэтигэр эдэр боксердары Өрөспүүбүлүкэ таһымыгар күрэх былдьаһыннаран кэлбит Саха Өрөспүүбүлүкэтин үөрэҕин үтүөлээх үлэһитин Дмитрий Николаевич Болтунову көрсөн кини иитиллээччилэрэ туох-ханнык ситиһиилээх күрэхтэһиилэргэ кыттыбыттарын билиһиннэрэргэ көрдөспүккэ бэрт судургутук ылынан санаа атастаста.
— Дмитрий Николаевич! Бастатан туран эн иитиллээччилэргин кытта балайда уһун бириэмэҕэ Саха Өрөспүүбүлүкэтин таһымыгар спортивнай күрэхтэһиилэргэ кыттан кэллигит. Ханнык күрэхтэһиилэргэ кытынныгыт уонна үлэҕит түмүгэ хайдаҕый?
— Алтынньы ый 24-28 күннэригэр Нерюнгри куоракка РФ үтүөлээх тренерэ «Размахин Н.Г. уонна РФ Аан дойдутааҕы кылаастаах маастара Сергей Исмаилов» кэриэстэригэр эригийиэннэр икки ардыларынааҕы күрэхтэһиигэ 2 үөрэнээч-чилэрим Павел Павлов, Харыйалаах орто оскуолатын IХ кылааһын үөрэнээччитэ (60 кг) киирсэн III миэстэ буолла, Эркин Николаев, Дьэлиҥдэ орто оскуолатын IХ кылааһын үөрэнээччитэ (63 кг) киирсэн II миэстэ буолла. Салгыы Горнай оройуонугар В.В. Народов бирииһигэр республиканскай күрэхтэһиигэ сельхозтехникум студена Слава Анисимов (52 кг) киир-сэн II миэстэни ылары ситистэ. Олимпийскай эрэллэр училищаларын студена Ольфред Павлов (60 кг) киирсэн I миэстэ буоларга ситиспитэ.
— Билиҥҥи бириэмэҕэ хас биирдии тренер иитиллээччилэрин 2024 сылга Дьокуускай куоракка ыытыллар Аан дойдутааҕы Азия оҕолорун спортивнай оонньууларыгар кыттыытын хааччыйарга күрэхтэһиннэрэ сылдьаллар. Бу олус эппиэттээх сүүмэрдээһини барыыга спортсмен ханнык оһуобай көрдөрүүлэрэ учуоттаналларын уонна ханнык хамыһыыйа быһаарарый?
— Нерюнгри куоракка ыытыллыбыт күрэхтэһии призердара Павел Павлов, Эркин Николаев Саха Өрөспүүбүлүкэтин оҕолорго уонна ыччаттарга кылаабынай тренера В.В. Лисаны кытта оробуочай кэпсэтии түмүгүнэн Азия спортивнай оонньууларыгар бэлэмнэнии сбордарга ыҥырыллар буоллулар.
— Дьокуускай куоракка ыытыллар Аан дойдутааҕы Азия оҕолорун спортивнай оонньууларыгар кыттарга кандидат буолар наадаҕа хаалбыт кэмҥэ эн иитиллээччилэриҥ ханнык сбордарга уонна күрэхтэһиилэргэ кыттыахтаахтарый?
Саха Өрөспүүбүлүкэтин таһымыгар ыытыллар күрэхтэһиилэргэ уонна сбордарга кандидат буолар спортсменнар былааннаахтык кыттыыларын хааччыйыахтаахпыт.
— 2023 сыл бүтүөр диэри ханнык улахан спортивнай күрэхтэһиилэргэ кыттар былаан баарый уонна оройуон дьаһалтатын өттүнэн календарнай былааҥҥа киирбит күрэхтэһиилэргэ кыттарга үбүлээһин туруга хайдаҕый?
— 2008-2009 сс. Төрүөх уолаттарга Дьокуускай куоракка РФ үтүөлээх тренера А.И. Пахомов кэриэһигэр Аан дойдутааҕы таһымнаах турнирга кыттыахтаахпыт.
Аан дойду таһымнаах күрэх ыытылларынан сибээстээн оройуон дьаһалтата үбүлээһини быһаарыа диэн эрэнэбит.
Сөптөөх түгэнинэн туһанан эдэр боксердары үрдүк таһымнаах күрэхтэһиилэргэ кытталларыгар көмөлөспүт Кирбэй национальнай нэһилиэгин дьаһалтатын баһылыгар Владислав Васильевич Николаевка, Дьэлиҥдэ национальнай нэһилиэгин дьаһалтатын баһылыгар Александр Прокопьевич Егоровка уонна тус көмөнү оҥорбут бокса бэтэрээннэригэр махталбын биллэрэбин уонна эһиги көмөҕүтүнэн өссө үрдүк ситиһиилэри ылыахпыт диэн эрэлбитин биллэрэбит.
— Убаастабыллаах Дмитрий Николаевич! “Сардаҥа” хаһыакка ыалдьыттаан, оройуон олохтоохторугар оҕо спортивнай оскуолатын кэлэктиибэ үүнэр 2024 сылга Дьокуускай куоракка ыытыллар Аан дойдутааҕы Азия оҕолорун спортивнай оонньууларыгар эдэр боксердар кыттыыларын хааччыйыыга ыытар үлэҕитин билиһиннэрбиккит иһин махталбынтын биллэрэбит уонна ситиһиилэри баҕара хаалабыт.
Николай Стручков