Күннээх Ээйиккэ кыстык түбүгэ салҕанан бара турар. Быйылгы дьылы этэҥҥэ туоруурга 176 туонна от оттонон бэлэмнэннэ. Эбии аhылык даҕаны добуоччу баар. Кыстыгы этэҥҥэ аhарыахпыт диэн эрэллээхпит.
«Эйик» СХППК 31 төбө хороҕор муостааҕы, ол иhигэр -13 ыанар ынаҕы кыстатан турар. Ынах-сүөһү төрүөҕэ быйыл бытаан, хойутуур туруктаах, бүгүҥҥү күннээҕи туругунан төрүөх ыла иликпит. Кыстыыр хотон ис өттүгэр өрөмүөннүүр үлэлэр барбыттара, онон сырдык уонна ичигэс туруктаах.
Биирдиилээн кэтэх хаhаайыстыбалаах дьон биhиги тыйыс тымныыбытыттан толлубакка куурусса иитиитинэн бэрт сатабыллаахтык дьарыгыраллар. Быйылгы кыстык дьыла этэҥҥэ ааһарыгар биһиэхэ, Ээйик олохтоохторугар эрэл кыыма баар.