Саха Өрөспүүбүлүкэтигэр биллэриллибит «Үлэ сылыгар» оройуон эдэр ыччаттара производство араас салааларыгар охсуулаах үлэ вахтатыгар тураннар үрдүк таһаарыылаах үлэни көрдөрөллөр.
Өлөөн сэлиэнньэтин олохтоох ыччата Антон Волошинов хаһыс да сылын ыччаттартан биригээдэ тэринэн сэлиэнньэни тупсаран оҥоруу үлэлэригэр бэриниилээхтик, сатабыллаахтык үлэни тэрийэн ыытар.
Аҥардас 2023 сыл сайынын бириэмэтигэр олохтоох ыччаттартан, устудьуоннартан биригээдэ тэринэн Заложнай уулуссаҕа нулевой цикла оҥоһуллуохтаах 30 кыбартыыралаах таас дьиэ тутуллар миэстэтин бэлэмнээн икки 6 кыбартыыралаах дьиэни көтүрэн, тутуу былаһааккатын бэлэмнээһини хааччыйда.
Салгыы оройуон дьаһалтатын сакааһынан 30-тан тахса сыллааҕыта тутуллубут гостиница дьиэтин дьаһалта кииннэммит бухгалтериятын офиһыгар уларытан оҥорууга ылсан Антон Волошинов 5 эдэр тутааччы Эдуард Коллеров, Вениамин Николаев, Федя Син-Хой, Богдан Софронов састааптаах биригээдэ отделочнай үлэлэрин сүрдээх хаачыстыбалаахтык оҥорон үлэ үөһүгэр сылдьаллар.
Билиҥҥи кэмҥэ гостиница таһынааҕы тупсаран оҥоруу үлэлэрин бүтэрэн иһинээҕи кабинеттар отделочнай үлэлэрин тупсаҕай көстүүлээх оҥоро сылдьаллар. Үлэ кабинеттарын түннүктэрэ, ааннара уларыйан, истиэнэлэрэ штукатуркаланан, кырааскаланан «таас офиска» тэҥнээх курдук оҥоһуллан үлэһиттэргэ туттарарга ыччат биригээдэтэ эрэллээхтик үлэни толоро сылдьар.
Эдэр ыччат тутууга биригээдэтэ (биригэдьиир Антон Волошинов) тутуу былаһааккатыгар үлэттэн сэрэхтээх буолууну хааччыйыыга уонна үлэ култууратын үрдэтиигэ бэрт тэрээһиннээхтик үлэни тэрийэн тутуу үлэтэ бара турар эбийиэгэр ханна да ыһылла-тоҕулла сытар тутуу матырыйаала көстүбэт. Күннээҕи үлэ түмүгүнэн өрөмүөн үлэтин тобох матырыйааллара ыраастанан, тимир матырыйааллар туспа, тутуу маһын туспа, үлэ тобоҕун анал куулларга кутан туспа дьаарыстаан иһэллэрэ тутуу былаһаакката тупсаҕай буолуутун хааччыйары ситиспиттэринэн астына бэлиэтиибит.
«Сардаҥа» хаһыат кэрэспэдьиэнэ Антон Волошиновы көрсөн олохтоох ыччаты тутуу үлэлэригэр салгыы үөрэтэргэ туох-ханнык былааннааҕын туһунан ыйытык оҥорбукка бэрт судургутук — Өлөөн ыччата бэйэтигэр эрэллээх буолуутун хааччыйыыга оройуон уонна Өлөөн национальнай нэһилиэгин дьаһалталара ыччаты үлэнэн хааччыйыыга ыытар үлэтигэр былааннаахтык көмөлөһөр буоллахтарына, тутууга оройуон эдэр ыччаттарын үлэлэтиигэ, үлэлиир баҕалааҕын биллэрдэ.
Николай Стручков