«Сардаҥа» хаһыат эрэдээксийэтэ оройуон тутааччыларыгар былааннаах тутуулары үлэҕэ киллэрэр эппиэттээх кэм үүммүтүнэн сибээстээн оройуон дьаһалтатын тутууга управлениетын салайааччыта Юлия Германовна Христофороваҕа ыалдьыттаан, 2023 сылга үлэҕэ киллэриллиэхтээх сүрүн туруга хайдаҕын билиһиннэрэргэ көрдөспүккэ бэрт судургутук ылынан баар балаһыанньаны билиһиннэрдэ.
— Юлия Германовна, бастатан туран эһиги сэтинньи ый саҕаланыыта Дьэлиҥдэ национальнай нэһилиэгэр оробуочай командировкаҕа баран үлэлээн кэллигит. Бу сыллааҕы тутуу былаанын быһыытынан Дьэлиҥдэ сэлиэнньэтигэр биир 4 кыбартыыралаах дьиэ уонна биир 10 кыбартыыралаах дьиэ тутуллан үлэҕэ киллэриллиэхтээхтэр. Билиҥҥи туругунан бу тутуулар үлэҕэ киллэриигэ бэлэмнэрэ хайдах туруктааҕый?
— Бастатан туран биир 4 кыбартыыралаах дьон олорор дьиэтин бэдэрээтчит «Норд-Мост» ХЭТ (дириэктэр Павлов Э.А.) үлэҕэ киллэриигэ бэлэмэ үчүгэй туруктаах. Оробуочай хамыыһыйаны көрүүгэ сакаасчыт өттүттэн улахан итэҕэстэр көстүбэтилэр. Отделочнай үлэлэри толорууга аҕыйах ситэ толоруллубатах үлэлэри ситэрэн биэрии оҥоһуллуохтаах. Бу эбийиэги тутуу хонтуруолун бэрэстэбиитэлэ кэллэҕинэ үлэҕэ киллэрэ кыах баар.
Маны тэҥэ Дьэлиҥдэ сэлиэнньэтигэр тутулла турар 10 кыбартыыралаах дьон олорор дьиэтин тутуутун Генбэдэрээтчит «Норд-Мост» ХЭТ (дириэктэр Павлов Э.А.) тутуутун үлэтин 80,0 бырыһыанын толорбут. Билиҥҥи кэмҥэ сылааһа киллэриллэн бу эбийиэккэ отделочнай үлэлэр уонна электриката оҥоһулла сылдьар.
Бэдэрээтчит былаанынан бу эбийиэги үлэҕэ ахсынньты ыйга киллэрэрэ соруктанан үлэни тэрийэ сылдьар.
Өлөөн сэлиэнньэтигэр «Армстрой» ХЭТ (генеральнай дириэктэр Аушев Р.М.) «Больничнай комплекс» 4 хочуоллаах кыбартаалынай хочуолунайын итиини биэрэр турба ситимин кытта тутан үлэҕэ сэтинньи ыйга киллэриэхтээх.
— Бу тутуу үлэҕэ ханнык бириэмэҕэ киллэриллиэхтээҕий уонна үлэҕэ киллэриллэр бэлэмэ хайдах туруктааҕый?
— Билиҥҥи кэмҥэ сүрүн тутар-монтажтыыр үлэлэр бырайыак быһыытынан толоруллан бүтэн тураллар. Бу күннэргэ энергетиктэр бу объегы уот ситимигэр холбуохтаахтар. Салгыы технологическай оборудованиетын үлэҕэ бэлэмин көрүү кэнниттэн тутуу эбийиэгэ оробуочай режимҥэ холбонуохтаах.
Сотору бириэмэнэн «Больничнай комплекс» кыбартаалынай хочуолунайын үөрүүлээхтик үлэҕэ киллэриигэ бэлэмнэнэбит.
— Өлөөн сэлиэнньэтигэр тутуллар «Үүт сыаҕа» бэдэрээтчит уонна сакаасчыт ИП Харабаев В.А. бу сылга тутуута хайдах туруктааҕый?
— Саха Өрөспүүбүлүкэтин тыатын хаһаайыстыбатын Министиэристибэтин хайысхатынан үбүлэниэхтээх Өлөөн сэлиэнньэтинээҕи «Үүт сыаҕа» үбүлээһинин боппуруоһа ситэ быһаарыллыбакка 2023 сылга үлэҕэ киллэриллибэт буолла. Бэдэрээтчит ИП Харабаев В.А. «Сардаҥа» хаһыат кэрэспэдьиэнигэр билиһиннэрбитинэн «Үүт сыаҕын» үбүлээһинин боппуруоһа бу дьыл ахсынньы ыйга быһаарылларыгар үлэ-хамнас ыытылла сылдьар эбит. Онон «Үүт сыаҕын» үлэҕэ киириитэ үүнэр 2024 сылга былааннанар.
— Кирбэй нэһилиэгинээҕи Харыйалаах сэлиэнньэтигэр оройуон дьаһалтатын сакааһынан тутуута былааҥҥа киирбит «Спортивнай саала» тутуута ханнык түһүмэҕэр тиийдэ?
— «Аурис» ХЭТ (дириэктэр Калачев А.Е.) бэдэрээтчитинэн ылсан тутуутун саҕалаабыт Харыйалаах сэлиэнньэтинээҕи спортивнай саала тутуута тутуллар матырыйаала ааспыт кыһыҥҥы суолунан ситэ тиэллэн кэлбэккэ консервацияҕа барда.
Оройуон дьаһалтатын былаанынан үүнэр 2024 сылга үлэҕэ киллэриигэ үлэ тэриллэн ыытыллар.
— Өлөөн сэлиэнньэтин олохтоохторо 2023 сылга үлэҕэ киириэ диэн күүппүт 30 кыбартыыралаах таас дьиэ тутуута хайдах быһаарыллыаҕай?
— Нэһилиэнньэни хаарбах дьиэттэн көһөрүү бырагырааматынан тутуута саҕаламмыт Өлөөн сэлиэнньэтинээҕи 30 кыбартыыралаах дьиэ тутуута проектнай институт исписэлиистэрин түмүктээһиннэринэн толоруллар технологията кыһыҥҥы намыһах температураҕа эппиэттээбэтинэн тохтотуллан турар. Үүнэр 2024 сыл сылаас кэмигэр тутуу үлэтэ толоруллан үлэҕэ киллэрэргэ соруктанабыт.
— Солоҕон национальнай нэһилиэгэр тутуллуохтаах икки 2 кыбартыыралаах дьиэлэр тутуулара хайдах быһаарыллар былаан баарый?
— Нэһилиэккэ эдэр исписэлиистэри олохсутарга анаан Ээйик сэлиэнньэтигэр тутуллуохтаах икки 2 кыбартыыралаах дьиэлэр тутууларын боппуруоһа аһаҕас турар.
Ыытыллыахтаах тутуу үлэтин таһыма намыһаҕынан, ороскуота үрдүгүнэн, тутуу матырыйаалын тиэйиитэ сөптөөх суол-исс суоҕа бэдэрээтчит тутууну тэрийэн ыытааччылары интэриэһиргэппэт.
Николай Стручков