Өлөөн эбэҥки национальнай оройуонугар быыбардар түмүктэннилэр. Сиһилии бу туһунан Өлөөннөөҕү быыбар хамыыһыйатын бэрэсэдээтэлэ Александр Петрович Васильев сырдатта.
Ол курдук, биһиги өрөспүүбүлүкэбит Ил Дарханын быыбарыгар куоластааччылартан 83,8 % кыттыыны ылан, ол эбэтэр 1 639 киһи кэлэн куоластаан бэйэтин гражданскай эбээһинэһин толордо.
Түмүк тахсыбытынан, биһиги оройуоммутугар Николаев Айсен Сергеевич 87,3 % ылан, кыайыылааҕынан таҕыста.
Ил Түмэн депутаттарын быыбарыгар элбэх куолаһы ылан (1195 киһи куоластаабыт, о.э. 72,9 %) «Единая Россия» баартыйа хотуулаах таҕыста.
«Справедливая Россия» баартыйаҕа 83 киһи куоластаата, о.э. 5,1 %; ЛДПР — 18 куолас (1 %); «Новые люди» — 43 куолас (2,6 %), КПРФ — 248 (15 %) уонна «Партия Родины» диэн баартыйаҕа — 4 киһи куоластаата.
Маны тэҥэ, 33-с национальнай хотугу быыбардыыр уокурукка — манна, 5 оройуон киирэр: Булуҥ, Анаабыр, Өлөөн, Эдьигээн, Кэбээйи — Ил Түмэн депутатын талыыга биһиги оройуонтан 1613 киһи кыттыыны ылла. Саамай элбэх куолаһы ылан, биир дойдулаахпыт Елена Христофоровна Голомарева 1407 киһи (87 %) итэҕэлин ылан кыайда,
Эверстов Михаил Ильичка 73 киһи куоластаата (4,5 %), Алексеев Аркадий Николаевич — 54 киһи (3,3 %), Афанасьев Савва Июльевич — 31 (1,9 %), Кобяков Евгений Касьяновичка — 17 (1 %).
Оройуон депутаттарын икки уокуругунан быыбардааһыҥҥа, о.э. 13 депутат партийнай испииһэгинэн талыыга 69 % куолаһы ылан Сугланҥа «Единая Россия» баартыйаттан 9 депутат киирдэ; «Справделивая Россия» 7,7 % куолаһы ылан — 1, уонна КПРФ 21,2 % куоластанан — 3 депутаттаннылар.
Оттон, 3 мандаттаах биир кэлим уокурукка Болтунов Дмитрий Николаевич — 55 %, Николаева Марина Христофоровна — 53 %, Федотова Татьяна Николаевна — 44 % быыбардааччылар итэҕэллэрин ылан Суглан депутаттарынан талылыннылар.
Уонна түмүккэ, икки нэһилиэккэ баһылыктары талыыга: 348 куолаһы (39 %) ылан Өлөөҥҥө — Романов Василий Николаевич уонна Кирбэйгэ 182 куоластанан (57,4 %) Николаев Владислав Васильевич хотуулаах таҕыстылар.