Сарсыардаттан судаарыстыба бары ханааллара сэргэх сонуну сырдатанан, Саха сирин олохтоохторо үөрүү аргыстаах саҥа күн сардаҥатын көрүстүлэр. Ол курдук, бүгүн Дьоруой уордьанынан икки саха буойуттара Филипп Евсеев уонна Алексей Неустроев Арассыыйа сэбилэниилээх күүстэрин үрдүкү хамандыырыттан, Бэрэсидьиэн Владимир Путинтан наҕараада туттулар. Бу түгэни туһанан, бүтүн өрөспүүбүлүкэ эҕэрдэтигэр Өлөөн оройуонун дьоно-сэргэтэ кыттыыны ылар.
Павлова Туйаара Егоровна, оройуон баһылыгын солбуйааччыта
— Бары билэрбит курдук, бүгүн Саха сириттэн сылдьар икки буойун эр бэрдэрэ хорсун быһыыларын иһин Арассыыйа үрдүкү наҕараадатын, Дьоруой аатын ыллылар. Бу үөрүүлээх түгэҥҥэ, Ил Дархан Айсен Николаев салалтатынан туһааннаах үлэ ыытыллан иккис Дьоруой аата ааттаммыта эмиэ элбэҕи кэпсиир. Ол курдук, Саха Сирэ сомоҕолоһуулааҕын, кырдьык иһин үлэлиир биир ситимнээҕин, санаалааҕын туоһута. Наҕараада ылбыт уолаттарга Өлөөн оройуонун олохтоохторун, салалтатын аатыттан улахан эҕэрдэ тиэрдэбин! Тус олоххутугар чэгиэн-чэбдик олоҕу, ситиһиини, дьолу-саргыны баҕаран туран алгыс тылбытын этэбит!
Николаев Егор Иосифович, үлэ бэтэрээнэ, Аҕа дойду сэриитин саҕанааҕы оҕо
— Аҕа дойду сэриитин саҕана саха саллааттара хорсун быҺыыларынан биллэллэр. Бу номох буолбут быҺыыны-майгыны, билиҥҥи Украинаҕа буола турар байыаннай эпэрээссийэҕэ барбыт, бойобуой садаанньаны толоро сылдьар уолаттарбыт салҕыыллар. Онон, Сахабыт сирин ыччаттара, буойуттара дойдуларын чиэҺин түҺэн биэрбэккэ, Ийэ дойдуларыгар ытык иэстэрин биэрэн дьоҺуннаахтык сулууспалыы сылдьалларыттан биҺиги үөрэбит, киэн туттабыт. Уолаттарбытын, «Алеша» танковай рота саллааттарын ис-санааттан Дьоруой уордьанын ылбыттарынан эҕэрдэлиибит уонна тус олохторугар дьолу, ситиҺиилэри баҕарабыт.
Николаева Екатерина Васильевна, библиотекарь
— Саха сириттэн сылдьар хорсун уолаттарбыт, танка экипаҺын байыастара Филипп Евсеев уонна Алексей Неустроев Верховнай главнокомандующай Владимир Путинтан Россия Дьоруойа наҕараада бэлиэтин туппуттарынан, Өлөөн оройуонун олохтоохторо киэн туттабыт! Кинилэр — ахсаанынан элбэх өстөөх броневой массыыналарын кытта танкалартан дьиксиммэккэ — тэҥэ суох кыргыҺыыттан хотуулаах тахсан, аан дойду үрдүнэн Саха сирин саарыннарын ааттарын ааттатан дьон махталын тутар чаастара үүмүтүнэн эҕэрдэлиибит!