Өлөөннөр Судаарыстыбаннас күнүгэр Илья Винокуровы аҕыннылар

Саха Өрөспүүбүлүкэтин судаарыстыбаннай суверенитетын биллэриллибитэ 33 сыллаах кэрдиис күнүгэр балаҕан ыйын 27 күнүгэр Өлөөн эбэҥки национальнай оройуонун дьаһалтата уонна улуус мунньаҕын депутаттара бу история кэрдиис кэмин суолтатыгар сүгүрүйэн күнүс 12 чаастан Саха Өрөспүүбүлүкэтин төрүттэспит биллиилээх судаарыстыбаннай уонна политическай салайааччы Илья Егорович Винокуров пааматынньыгар миитиннээн, дьон-киһи сүргэтин көтөхтүлэр.

Үөрүүлээх миитини судаарыстыбаннай сулууспа бэтэрээнэ Наталья Денисовна Семенова арыйар уонна судаарыстыбаннай суверенитет туһунан Декларация ылыллыбыт кэрэ-бэлиэ кэрдиис кэминэн эҕэрдэлээн туран эҕэрдэ этиини этэригэр бастатан оройуон дьаһалтатын баһылыгын бастакы солбуйааччы Иван Александрович Саввиновка биэрэр.

Кини Саха Өрөспүүбүлүкэтин инники сайдыытын модун күүстээх Россияны кытта бииргэ сайдыытын быһаарбыт өрөспүүбүлүкэ судаарыстыбаннай суверениетын туһунан Декларация оһуобай суолталааҕын бэлиэтээтэ.

Салгыы Саха Өрөспүүбүлүкэтин судаарыстыбаннай суверениетын күнүнэн эҕэрдэ этиини оҥордулар оройуон бэтэрээннэрин Сэбиэтин бэрэссэдээтэлэ Валентина Саввична Гаврильева, улуус мунньаҕын депутата Алла Тарасовна Петрова уонна да атын уопсастыбаннас бэрэстэбиитэллэрэ.

Оройуон бары нэһилиэктэригэр Саха Өрөспүүбүлүкэтин судаарыстыбаннай суверениетын туһунан Декларация ылыллыбыт күнүн бэлиэтээн култуура дьиэлэригэр үөрүүлээх тэрээһиннэр тэриллэн ыытылыннылар.

Сонуннарга анаан Н.М.Стручков

Читайте дальше