Өлөөн эбэҥки национальнай оройуонугар 2023 сылга биллэриллибит «Эбэҥки тылын сылын» биир улахан тэрээһиннэринэн буолла Саха Өрөспүүбүлүкэтин Хотугу аҕыйах ахсааннаах төрүт норуоттарын бастакы хаһыаттарын «Эведы Илкэн» (Эбэҥкилэр суолдьуттара) хаһыаты төрүттээбит, бастакы эдэрээктэр, РФ Суруналыыстарын Союһун чилиэнэ, Өлөөн оройуонун төрүт олохтооҕун Семенов Михаил Николаевич — Амака 90 сааһын бэлдиэтээһин тэриллэ\н ыытылынна.
Бырааһынньыктыы киэргэтиллибит А.С.Иванов аатынан этнокультурнай Киин уораҕайыгар эбэҥки норуотун төрүт култууратын, аҕа уустар бэлиэлэрин көрдөрөр быыстапкалар тэриллэн туруоруллубуттар.
Олохтоох көс омуктар туттар сэптэрэ-сэбиргэллэрэ, материальнай уонна духуобунай култууралырыен бэлиэтиир олох ураһалар туруоруллубуттар. Эбэҥки норуотун бастакы бэчээтинэй хаһыатын «Эведы Илкэн» күн сирин көрбүт историята оҥоһуллан сырдатыллыбыт.
Үөрүүлээх тэрээһини арыйыы сиэрэ-туома култуура Киинин улахан саалатыгар тэриллэн ыытыллыбытын кэннэ олохтоох эбэҥки норуотун тылын-өһүн материальнай уонна духуобунай култуураларын көрдөрөр национальнай холбоһуктар, ансаамбыллар эҕэрдэ кэнсиэр тэриллэн ыытылынна.
Саха Өрөспүүбүлүкэтин култууратын үтүөлээх үлэһитин Надежда Николаевна салалтатынан эбэҥки норуотун бастакы бэчээттэммит уорганын «Эведы Илкэн» хаһыат бастакы эрэдээктэрин Михаил Николаевич Семенов — Амака үлэтин, олоҕун сырдатыы тэриллэн ыытылынна.
Салгыы эбэҥки норуотун суруга-бичигэ, материальнай уонна духуобунай култуурата сайдарыгар, тылын үөрэтиини ситиһиигэ Михаил Николаевич Семенов — Амака киллэрбит үтүөтүн-өҥөтүн сыаналаан эҕэрдэ этиини оҥордулар Өлөөн эбэҥки национальнай оройуонун муниципальнай дьаһалтатын баһылыгын бастакы солбуйааччы Иван Саввинов, Дьокуускайтан быһа сибээһинэн эбэҥкилэр Ытык сүбэлэрин бэрэссэдээтэлэ Марфусалова А.Д., «Илкэн» хаһыат эрэдээктэрэ Исаков А.В., оройуон кииннэммит библиотекатын үлэһитэ, Саха Өрөспүүбүлүкэтин норуотун хаһаайыстыбатын үтүөлээх үлэһитэ Семенова Н.Д., Өлөөн эбэҥки национальнай оройуонун кырдьаҕастарын Ытык сүбэтин « Осикта» бэрэссэдээтэлэ Стручков Н.М. уо.д.а. ыҥырыылаах ыалдьыттар. Бэлиэ тэрээһин эбэҥкилии, сахалыы тылынан хоһоону ааҕыы күрэҕинэн уонна кэлэктиибинэй хаартыска түһүүтүнэн түмүктэннэ.
Дьоһун тэрээһин түмүктүүр түһүмэҕэр «Эведы Илкэн» хаһыат бастакы эрэдээктэрин Семенов Михаил Николаевич -Амака оҕолоро Мира Михайловна, Валентина Михйловна аҕаларын үлэтин үрдүктүк сыаналаан бэлиэ тэрээһини тэрийэн дьон-киһи билиитигэр таһаарбыттарын иһин оройуон дьаһалтатыгар, култуура оройуоннааҕы салаатыгар махталларын биллэрдилэр.
Николай Стручков