Ахсынньы ый 12-15 күннэригэр Дьокуускай куоракка Хотугу аҕыйах ахсааннаах төрүт норуоттар Ассоциацияларын VIII сийиэһэ үлэлээтэ.
Өлөөн эбэҥки национальнай оройуонуттан ХААТН Ассоциацияларын сийиэскэ икки делегат — оройуон дьаһалтатын баһылыга Лена Степановна Иванова уонна ХААТН Ассоциациятын оройуоннааҕы салаатын бэрэссэдээтэлин солбуйааччы Владислав Васильевич Семенов, кыттыыны ыллылар.
«Сардаҥа» хаһыат эрэдээксийэтэ быһа сибээһинэн тахсан Владислав Семеновы сийиэс үлэтин хайдах сыаналыырын туһунан ыйытыы оҥорбукка, Саха Өрөспүүбүлүкэтин салалтата сийиэс үлэтигэр улахан суолтаны биэрэн, пленарнай мунньах саҕаланыытыгар өрөспүүбүлүкэ аҕыйах ахсааннаах төрүт норуоттарын социальнай-экэнэмиичэскэй сайдыыларын боппуруоһугар улахан бырагыраамынай этиини СӨ Ил Дархана Айсен Сергеевич Николаев оҥорбутуттан астынарын биллэрдэ.
Сийиэс делегаттара Хотугу аҕыйах ахсааннаах төрүт норуоттар Ассоциацияларын биэс сыллаах үлэтин уонна инники соруктар тустарынан Ассоциация Президенэ Андрей Васильевич Кривошапкин дакылаатын иһиттилэр уонна дьүүллэһиигэ киирдилэр.
Николай Стручков