Туяра Петрова, Өлөөннөөҕү хотугу норуоттар түмэллэрин методиһэ:
— Биһиги Өлөөннөөҕү кыраайы үөрэтэр музей үлэһиттэрин кэлэктиибэ Өрөспүүбүлүкэбит Ил Дархана Айсен Сергеевич Николаев Ил Түмэҥҥэ туһаайан этиитигэр кэлэр 2024 сыл Оҕо сылынан биллэриллэр диэбитин олус сэргээтибит. Арассыыйаҕа бэрэсидьиэммит Владимир Путин кэлэр сылы Дьиэ кэргэн сылынан биллэрбитэ, онно сыһыаран биһиэхэ оҕо сыла буолуо, онон биир ситимнээхтик үлэлиэхпит. Өбүгэ үгэстэрин, култууратын үөрэтии киэҥ далааһыннаах саҕахтары аҕалыа диэн эрэнэбит.
Ил Дархан оҕо туһугар элбэҕи оҥорор. Ол курдук, бу туһаайыытыгар “Юный житель Якутии” диэн 13 сааһыгар диэри анал каарта арыллыа диэн эттэ, бу элбэх оҕолоох ыалга улахан көмө буолуо. Киинэҕэ, театрга сылдьалларын таһынан, оҕо сайдар кииннэригэр, успуордунан дьарыктаналларыгар төһүү күүс буолуо. Улахан куораттарга маннык дьарык барыта төлөбүрдээх. Ил Дархан итини таһынан атын да үлэлэр тустарынан, тутуу, бырамыысыланнас сайдыа диэн бэлиэтээтэ. Ол курдук, култуура дыбарыастара, балыыһалар элбэх улуустарга баар буолбуттара сөптөөх үлэ барарын туоһута.