Саҥа Дьыл бырааһынньыгын иннинэ, Кирбэй нэһилиэгин баһылыга Владислав Васильевич Николаев олохтоохторго биир сыллааҕы үлэтин түмүктэрин отчуоттаата. Отчуокка сыл устата барбыт, оҥоһуллубут үлэлэр, тутууга, суол оҥоһуутугар, дьон олоҕун укулаатын тупсарыыга туох ситиһиллибитин, кыаллыбатах боппуруостар таарылыннылар.
Сыл устата араас тэрээһиннэр тиһигин быспакка ыытылыннылар, культура, бибилэтиэкэ, дьахтар кэмитиэтэ, социальнай блок, түмсүүлэр, биирдиилээн дьон, спортсменнар бары бэйэлэрин эйгэлэригэр ситиһиилээх үлэлэринэн нэһилиэги ааттатан, 2023 сылы үтүө түмүктэрдээх атааран эрэбит. Туох үлэ барбытын хаһыат нөҥүө сырдата турабыт, онон баһылык Влалислав Васильевич инники сылларга былааннанар сүрүн үлэлэрин билиһиннэрбитин кэпсиэм.
Бу кэлэр сылларга түөртүү кыбартыыралаах биэс хаарбах дьиэ көтүллүөҕэ. икки саҥа 12-лии кыбартыыыралаах таас дьиэлэр тутуулара саҕаланыаҕа.
Владислав Васильевич отчуотугар суһал байыаннай дьайыыга кытта сылдьар биир дойдулаахтарбытыгар үп-харчы, сылаас таҥас, туттар тэрил, төрүт ас хомуйан көмө оҥорор бар дьонугар махтанарын биллэрдэ. Оскуола оҕолоро учууталларын, кылаастарынан салайааччыларын кытта чүмэчи, араас аахсыйалары ыыталларын бэлиэтээтэ. Спорт араас таһымнаах күрэхтэһиилэригэр кыттан оҕолор үрдүк ситиһиилэри ситиспиттэриттэн үөрэрин эттэ, кэскиллээх оҕолор баалларын ыйда. Ол курдук, 15 саастаах Борисов Дима көҥүл тустууга Арассыыйа маастарга кандидатын нуорматын толорбутунан чугас дьоннорун эҕэрдэлээтэ. Маннык улахан ситиһии оҕолорго дэҥҥэ тиксэр, сыралаах үлэттэн кэлэр диэтэ.
Христофоров Х.А. аатынан Харыйалаах орто оскуолатын үөрэнээччилэрэ Иванов Дьулус, Федоров Миша Чурапчы улууһун Хайахсыт нэһилиэгэр Ильмень күөлгэ кыргыһыы бүппүтэ 80 сылыгар аналлаах, 3-с төгүлүн ыытыллыбыт өрөспүүбүлүкэтээҕи күрэхтэһиигэ патриотическай ырыа көрүүтүгэр кыттан 2 миэстэ буолбуттара. Үөрэнээччилэр ситиһиилэрэ итинэн эрэ бүппэт.
Нэһилиэк баһылыгын биир сыллаах үлэтин сүнньүнэн Ольга Потаповна, Татьяна Петровна, Надежда Колодезникова, Христофор Васильев кэпсэтиигэ кытыннылар уонна нэһилиэк дьаһалтатын үлэтин үчүгэйинэн сыаналыырга диэн этии киллэрдилэр.
ППМИ бырайыак суруйан Кирбэй нэһилиэгин 2 сайаапката кыайыылааҕынан тахсан, 2024 сылга кытаанах бөҕү хомуйар анал контейнердары ылар кыахтанна. Маны сэргэ, оскуола аттыгар оҕолорго анаан байыаннай былаһаакка оҥоһуутугар үп- харчы ылары ситистилэр. Кэлэр сылга өссө спорт саалата салгыы тутуута баран киллэриэхпит диэн былааннаахпыт.
Нэһилиэк дьаһалтата тэрилтэлэри кытта биир сүбэнэн үлэлииллэр, сайыны көрсөр эбэҥкилэр күннэриттэн саҕалаан дьон сынньалаҥын сөптөөхтүк тэрийииттэн ыраастаныы, хомунуу субуотунньуктарыгар оҕолуун тахсаллар. Күһүн саастаах дьоҥҥо муус бэлэмнээн таһаарыыта нэһилиэк эдэр ыалларын оҕолору хабан бэрт сэргэхтик ыытыллыбыта
Ким түмсүүлээх, ол инники! Кэлэр сыл тохсунньу 25 күнүгэр ыытыллар уопсастыбаннай истии боппуруоһугар ыытыллар мунньаҕы Кирбэй нэһилиэгин олохтоохторо актовай саалаҕа буолбакка “Илькээнни” сынньалаҥ киинигэр ыытарга диэн этии киллэрдилэр. Онон, бу боппуруоска сөптөөх дьаһал ылыллыа диэн эрэнэбит.