Дойду сирин-уотун, ханан тайаан сытарын бэлиэтиир сүрүн бэлиэбит карта буолар.
Симэх, галерея тэрийиитинэн, оройуоннар карталарын илиинэн тигэн оҥорон биир улахан Саха Сирин картатыгар сыһыары тигии буолбута.
Бырайыак бүтүн Арассыыйаҕа ыытылла турар бырайыак буолар. Бырайыак чэрчитинэн Өлөөн маастардара оҕуруонан тигэн Саха Сирин картатыгар сыһыары тигэн Симэх галереяҕа туттарбыттара.
Аахсыйаҕа кыттан Кирбэй уус тарбахтаах далбар хотуттара мустан Өлөөн картатын араас матырыйаалтан оҥорон бу күннэргэ улуус култуураҕа салаатыгар туттардылар. Киһи сатаабатын киһи сатыахтаах диэн санааттан бу сырыыга маастардар араас матырыйаалларынан үлэлээтилэр. Кинилэр оҥоһуктарыгар бэйэбитигэр баары туһаҕа таһаарыахха диэн санаанан салайтардылар.
Ол курдук, балык, көтөр,кырынаас, тугут тириилэрэ, таба сарыыта, тыс кырадаһына, оҕуруо туттулунна. Маннык хомуллан бииргэ үлэлиир бэйэ-бэйэҕэ уоппут атастаһыы, үөрэтиһии уонна уопсастыбаҕа көхтөөх буолууга, үчүгэйгэ, кэрэҕэ сирдиир тэрээһин диэн санааҕа кэлэҕин. Бириэмэни күнүнэн сөпкө аттара үөрэнии. Инникитин да хомулла туруохпут диэн санаалаахпыт.
Надежда Колодезникова