Мин эһигини интэриэһинэй дьарыктаах иитээччини кытары билиһиннэриэхпин баҕарабын. Биһиги Екатерина Павловна Степановалыын 2015 сыллаахтан билсэбит. Кини “Кэнчээри” уһуйаан киэҥ билиилээх иитээччитэ, үөрэҕирии туйгуна. Сөбүлүүр дьарыга — маһынан уһаныы.
Степановтар дьиэ-кэргэн 2014 сыллаахха алаһа дьиэлэрин тутталларыгар убайа лобзигынан нарын-намчы оһуордары быспытын көрөн, Екатерина Павловна ол кэмтэн бэйэтэ үөрэнэн, бүгүҥҥү күҥҥэ диэри уһанар арахсыспат доҕоро лобзик буолар. «Баҕа санаам диэн сахалыы сундуук оҥоруу этэ, ол баҕабын толорон 20 сундуук оҥордум. Үлэбэр группам оҕолоругар араас оонньуурдары оҥоробун. Бэйэм хас да айбыт оонньуулардаахпын, былырыын 7 түһүмэхтээх «Бэркэн уонна Гарпанча» диэн остуол оонньуутун оҥорбутум. Уһуйааммыт оҕолоро сөбүлээн оонньууллар.
2024 сыл ахсынньы ыйыгар Дьокуускай куоракка Олоҥхо декадатын чэрчитинэн өрөспүүбүлүкэтээҕи «Олоҥхо оонньуурдара уонна оонньуулара» бэйэ оҥоруу күрэҕэр кыттыбытым. Бу күрэххэ уопсайа 97 киһи кыттыбыта. Күрэҕи 4 секциянан арааран ыыппыттара: хамсаныылаах оонньуулар, остуол оонньуулара, музыкальнай оонньуулар уонна тутар, таҥар оонньуулар. Саамай элбэх кыттааччы остуол оонньууларын күрэҕэр кыттыбыта. Мин күрэх түмүгүнэн «Өбүгэ үгэһин оонньуулара» добун сурук номинацияны тутан сүргэм көтөҕүллүбүтэ уонна Сахабыт сиригэр элбэх дэгиттэр талааннаах дьон баарыттан сөхтүм.
Иитээччи сүрүн көмөлөһөөччүлэринэн биһиги иитиллээччилэрбит төрөппүттэрэ буолаллар. Биир оннук көхтөөх төрөппүттэринэн мин иитиллээччим Кадарий ийэлээх аҕата Кристина уонна Демид Гоголевтар буолаллар. Кинилэр дьиэ тутталларыгар уһанарга сөптөөх элбэх фанера ордуга хаалбытын миэхэ биэрэннэр, уһанарбар өссө тирэхтэммитим. Оонньуурдарбын уруһуйдуурга эдэр логопед-педагогпут, илиитигэр талааннаах Евдокия Яковлева уонна бастакы выпускнигым Любовь Ванчугова өрүү күүс-көмө буолаллар» — диэн сэһэргиир Екатерина Павловна.
Екатерина маһынан оҥорбут оонньуурдарын көрөн киһи эрэ сөҕө, астына көрөр, оонньуур. Араас остуоруйа кыыллара, уолаттар, кыргыттар билигин аҕай эйиигин кытары түһэн оонньоон, сүүрэн-көтөн барыах курдуктар. Маны таһынан кини фанераттан сахалыы харысхаллары, эбэҥкилии тыыннаах полкалары, телефон подставкаларын, табалары быһан, быһа сиэтии (выжигание) көмөтүнэн оһуор-дьарҕаа түһэрэн оҥорор.
«Юктэкэн» мульстудиятыгар иитээччилэрин кытары уһулбут мультфильмнара «Космоска аартыкка» курэххэ (2022 с.) «Зузу и Гарпанча» -II м, «Первый космонавт Юрий Гагарин» (2024 с.) – III м, П.Тобуруокап төрөөбүтэ 105 сылыгар аналлаах “Тобуруокап оҕо сааьа” өрөспүүбүлүкэтээҕи тэрээһин «Тоҕо» мультфильм — I м,«Булчуттар» — III м, Российскай мультфильм күрэҕэр «Два веселых гуся», «Репка», «Первый космонавт» бириистээх миэстэҕэ тиксибиттэрэ.
Маны сэргэ, Екатерина Павловна улууспутугар оҕолорго аналлаах «Чобуо чооруостар» проектаах, бу күрэххэ улууспут уһуйааннарын оҕолоро көхтөөхтүк кыттан бириистээх миэстэҕэ тиксэллэр.
“Кэнчээри” уһуйаан үлэһиттэрэ улууска ыытыллар култуура, успуорт тэрээһиннэригэр көхтөөхтүк кытталлар. Ол курдук, Екатерина Степанова «А зори здесь тихие», «Снайпер тунгус» киинэлэргэ олоҕуран суруйбут сценарийдарынан Кыайыы күнүгэр аналлаах инсценировкаҕа кыттан кыайыы көтөллөнөн тураллар.
Дьэ бу курдук, Екатерина Павловна Степанова барытыгар дэгиттэр талааннаах киһи буолар.
Аргунова М.П., «Кэрэчээнэ» уһуйаан иитээччитэ