Бу дьыл сэтинньи ый 28 күнүгэр оройуон дьаһалтатын аактабай саалатыгар норуот депутаттарын оройуоннааҕы Сэбиэттэрин «Суглан» иккис уочараттаах сессията үлэлээтэ.
Оройуон депутаттарын Сэбиэтин «Суглан» сессиятын кылгас киирии этиинэн «Суглан» бэрэссэдээтэлэ Никан Николаев арыйда. Кини сессия үлэтин саҕалыырга этии киллэрэн, сессия үлэтин күннээҕи бэбиэскэтигэр 7 боппуруоһу көрөргө депутаттар биир санаанан куоластаатылар.
Сессияны көрүүгэ бастакы боппуруоһунан «Өлөөн эбэҥки национальнай оройуонун бүддьүөтүн 2023 сыл 9 ыйын түмүгүнэн туолан иһиитин туһунан» иһитиннэриини оройуон финансовай управлениетын начальнига Я.Г. Федорова туруорда.
Иккис боппуруоһунан Я.Федорова «Олохтоох бэйэни салайыныы муниципальнай тэрээһинин 2023 сыл 9 ыйын түмүгүнэн үбүлээһинин уонна үлэһиттэрин ахсаанын туһунан» иһитиннэриини уонна үһүс боппуруоһунан турбут Муниципальнай оройуон 2024 сыллааҕы бүддьүөтүн уонна 2025-2026 сс. былааннааһын барылын бастакы ааҕыыга иһитиннэриини оҥордо.
Оройуон Сэбиэтин сессиятын төрдүс боппуруоһунан дойдуну көмүскүүр барбыт суһал байыаннай дьайыы кыттыылаахтарыгар уонна кинилэр дьиэ кэргэттэригэр көмөнү оҥорууга үлэни тэрийии туһунан иһитиннэриини «Суглан» бэрэссэдээтэлин солбуйааччы Илья Типянов оҥордо.
Бэһис боппуруоһунан «Оройуон депутаттарын Сэбиэтин үлэни тэрийээччилэригэр уокуруктарынан сыһыаран үлэлэтии» туһунан иһитиннэриини депутат Прокопий Павлов туруорда.
Алтыс боппуруоһунан «Өлөөн эбэҥки национальнай оройуон бочуоттаах олохтооҕун үрдүк аатын Христофоров Анатолий Филипповичка (өлбүтүн кэннэ) аныыр туһунан» иһитиннэриини оройуон депутаттарын Сэбиэтин «Суглан» бэрэссэдээтэлэ Никан Николаев туруорда. Депутаттар биир санаанан уһулуччулаах биир дойдулаахпытыгар Христофоров Анатолий Филипповичка “Оройуон Бочуоттаах олохтооҕо” үрдүк аатын иҥэрэргэ быһаарыы ылыннылар.
Сессия түмүктүүр чааһыгар оройуон депутаттарын Сэбиэтин «Суглан» бэрэссэдээтэлэ Никан Николаев үөрүүлээх быһыыга-майгыга оройуон депутаттарыгар дастабырыанньалары уонна бэлиэлэри туттартаата.
Көрүллүбүт боппуруостарга оройуон инники сайдыытын хааччыйарга аналлаах тустаах быһаарыылар ылынылыннылар. Оройуон депутаттара «Суглан» бэһис ыҥырыылаах иккис сессият үлэтин кэлэктиибинэй хаартыскаҕа түһүүнэн түмүктээтилэр.
Николай Стручков