Рамир Николаев Италияҕа буолан ааспыт стендовай ытыыга эдэрдэргэ аан дойду Кубогар күрэхтэһиигэ соргулаахтык кытынна, бу туһунан sportyakutia.ru сайт суруйар.
Биһиги биир дойдулаахпыт “трап” диэн диссипилиинэҕэ үрүҥ көмүс мэтээли ылары ситистэ. Рамир Россия састаабын хамаандатыгар киирэн кытынна уонна бу ситиһиитинэн норуоттар икки ардыларынааҕы кылаастаах успуорт маастарын нуорматын толордо. Буолаары буолан олимпийскай көрүҥҥэ, уонна сахалартан аан бастакынан. Дьэ, бу ситиһии!
Даҕатан этэххэ, эдэр ытааччы икки нэдиэлэ аннараа өттүгэр эр дьоҥҥо Арассыыйа чөмпүйэнээтигэр эмиэ үрүҥ көмүс призерунан буолан турар.