Тумус туттар киһибит

Ханнык баҕарар нэһилиэк тумус туттар үтүө дьоннордоох, бэйэтин дойдутугар үтүөнү оҥорбут убаастанар дьоннордоох буолар. Солоҕоон нэһилиэгэр биир оннук ытыктанар-убаастанар дьоннортон биирдэстэринэн биһиэхэ Федоров Григорий Иванович буолар.

Бу соторутааҕыта Григорий Иванович биһиги нэһилиэкпититтэн Ийэ дойдубутугар куттал суох буолуутун туһугар суһал байыаннай дьайыыга кытта сылдьар 7 уол төрөппүттэригэр көмө оҥордо. Ол курдук, биһиэхэ, Хоту кытыы сиргэ олорон булдунан дьарыктанар дьоҥҥо тиэхиньикэ уматыга олус элбэҕи быһаарар. Григорий Иванович бу кыһалҕаны этинэн-хаанынан билбит киһи быһыытынан, уолаттарбыт төрөппүттэригэр 1-дии буочука бензин биэрэн көмөлөстө.

Григорий Иванович биир дойдулаахтарыгар көмөтө манан эрэ муҥурдаммат. Уруккуну санаан аһардахха, билэрбит курдук, 90-нус сылларга барарга- кэлэргэ ыарахан кэмнэр этэ. Онуоха кини автобус булан, суол-иис мөлтөҕөр Дьокуускай куораттан үрдүк категориялаах быраастар биригээдэлэрин кэпсэтэн Ээйиккэ аҕалбыта. Биригээдэ кэлэн оҕотуттан кырдьаҕаһыгар тиийэ, нэһилиэнньэни 100 бырыһыан көрбүтэ. Ол түмүгэр 2 оҕо куоракка эмтэнэн кэлбиттэрэ.

Кыһыҥҥы бириэмэҕэ Ээйиккэ оттук таһыыта, кэлэрэ уустуктааҕын биһиги бары билэбит. Онуоха Григорий Иванович оттугу таһарга, суолу оҥорууга эмиэ үлэлэспитэ. Бэйэтэ оттугу таспыта, суолу бириэмэтигэр астаран бэлэмниирэ.

Нэһилиэк олохтоохторо Иван Григорьевич уонна Прасковья Прокопьевна Федоровтар дьиэ кэргэннэрин өйдүүбүт. Прасковья Прокопьевна олоҕун устата оҕону иитиигэ бэриниилээхтик үлэлээбитэ, кини илиитин иһинэн нэһилиэк хас да көлүөнэ оҕото ааспыта. Кини тапталлаах ийэ, эбээ уонна киһи мааныта этэ. Кэлбит ыалдьыты өрүү толору астаах остуоллаах, итии чэйдээх көрсөр элэккэй хаһаайка буолааччы.   Иван Григорьевич Өлөөн улууһугар спорду өрө туппут киһинэн биллэр. Айылҕаттан сымса, кыанар, түргэн- тарҕан туттуулаах эр киһи бэрдэ этэ. Мындыр өйдөөх, толкуйдаах, ханнык да үлэттэн толлон турбат дьоһуннаах киһи буолара.

Григорий Иванович быйыл суһал байыаннай дьайыы геройдарын дьиэ кэргэттэригэр «Михаил Светлов» теплоходка Лена очуостарыгар круизка путевка бэлэхтээн дьиэ кэргэннэринээн баран сынньанан кэлбиттэрэ

Түгэнинэн туһанан, Григорий Ивановичка ис сүрэхпититтэн махтанабыт, тус бэйэтигэр, дьиэ кэргэнигэр чэгиэн доруобуйаны, ситиһиини, дьолу баҕарабыт.

Ээйик сэлиэнньэтин олохтоохторо