Кирбэй нэһилиэгэр Улуус төрүттэммитэ 88 сылыгар аналлаах тэрээһиннэр түөлбэлэр сыллааҕы үлэлэрин түмүктээһин чэрчитинэн ыытылыннылар. Өрүү буоларын курдук нэһилиэк олохтоохторо кыралыын, кырдьаҕастыын түөлбэлэринэн параадтан саҕаланна.
Түөлбэлэр биир сылга араас тэрээһиннэргэ кыттыбыттарынан баал ылан, мунньунан иһэллэр. Ол курдук, успуорт көрүҥнэринэн күрэхтэһиилэртэн, ырааһырдыы субуотунньуктарга тахсыы, бэтэрээннэргэ көмөлөһүү, муус, мас бэлэмнээһинэ уонна саамай духуобунаспытын уһугуннарар култуурунай тэрээһиннэргэ кыттыыга маассабаһынан көрүү түмүгүнэн кыайыылаах түөлбэ быһаарыллар.
Хас биирдии түөлбэ сыл иһигэр бары кыралыын кырдьаҕастыын туора турбакка кыттыылара өрүү да үрдүк буолааччы. Улуус күнүгэр сөп түбэһиннэрэн былырыыҥҥыттан саҕаламмыт күрэхпит түмүгүн истээри өссө ураһаланан, уус-уран оҥоһуктар быыстапкалара туруорулунна. Хайа баҕарар бэлиэ күн саамай сиэдэрэй киэргэлэ толору өбүгэ астаах остуоллар киһи хараҕар быраҕылла тардылыннылар. Хаһаайкалар кыһаллан туран астаабыттарын киһи хайгыыр, ыалларга ыаллаһан амсайан астынныбыт, өбүгэбит хатаран ууруна сылдьан сиир астара дьикти минньигэс,эттэн,балыктан бүлүүдэлэрин бэйэ үүннэрбит оҕуруот аһынан киэргэппиттэрэ хараҕы сымнатар. Ону тэҥэ хас биирдии түөлбэ ыаллара, олохтоохторо эһэлэрин, эбэлэрин тутта сылдьыбыт малларын аҕалан көрдөрбүттэрэ туспа улахан суолта.
Бу буолар өбүгэ духуобунай баайын ууруу-харайыы, үҥүү-сүгүрүйүү, дириҥ ытыктабыл бэлиэтэ. Нэһилиэк баһылыга Владислав Васильевич улуус күнүнэн олохтоохтору эҕэрдэлээн туран Кирбэй нэһилиэгин бочуоттаах олохтооҕо бэлиэни үлэ бэтэрээннэригэр, актыбыыстарга Ольга Потаповнаҕа, Антонина Николаевнаҕа, Елена Константиновнаҕа, Яков Прокопьевичка туттартаата. Иитээччи уонна наставник, Үлэ сылларынан бэтэрээн учууталларга, тыа хаһаайыстыбатын бастыцнарыгар улуус, олохтоох дьаһалталар Махтал суруктара, грамоталара туттарылыннылар. Успуорт эйгэтигэр уһуйааччы Иннокентий Валерьевич иитиллээччилэрин өбүгэ оонньууларын көрүҥэр күрэхтэһии тэрийбитэ улуус күнүн өссө биир ураты тэрээһининэн буолла. Кыттыбыт уолаттар наарталары ыстанан кыыраттылар,оҕолорбут чахчы да успуортка дьулуһуулаахтарын, бэйэлэрин кыаналларын көрөн итэҕэйдибит. Кыттааччылар ситиһиилэрин, ким хаһыс миэстэ буолбутун аныгы нүөмэргэ сырдатыахпыт.
Сылы быһа ыытыллыбыт нэһилиэнньэни түмэр түөлбэлэринэн күрэхтэр түмүктэринэн бастакы“Неравумни” -“Сайдыы”-сал. Елена Федорова , иккис “Давдын”- “Кыайыы” – сал.Саргылана Матвеева, үһүс “Гарпалин”- “Саһарҕа”- сал.Татьяна Семенова,төрдүс “Арун”-“ Үрдэл” — сал. Христина Бургай миэстэлэри ылан үөрүү өрөгөйүн биллилэр. Бу бырайыак ааптардара олохтоох дьаһалта уонна түөлбэ салайааччылара бииргэ ылыммыт былааннаах үлэлэрэ, онон салайаааччыларга махтанабыт. Улуус күнэ тэрээһиннээхтик ыытылларыгар биллэн турар култуура үлэһиттэрэ Уруйдаана Николаева, Михаил Карпов, Ньургун Бурцев музыка, тыас –уус, быыстапка туруорууга, ураһалары туруорууга төһүү күүс буолалларын бэлиэтиир наада. Ити курдук, түөлбэлэр биэчэри остуол тула олорон итии чэйдээх, өбүгэ астаах остуол тула олорон аныгы саца аҕахтары арыйар кэскиллээх кэпсэтиилэринэн түмүктэннэ.
Түөлбэнэн үлэ күүһэ- сомоҕолоһуу, эйэ, көхтөөх үлэ, түмүгэ-ситиһии, кыайыы дьоллоох түгэнэ. Сылын аайы түөлбэлээн үлэ өссө саҥа саҕахтары арыйдын, саҥа санаалары сахтын, бары кыттыбыт олохтоохторго ситиһиилэри, этэҥҥэ буолууну!