Өлөөн улууһун оҕо спортивнай оскуолатын саалатыгар үс оройуон спортсмен оҕолоро Саха Өрөспүүбүлүкэтин үтүөлээх тириэньэрэ Илларионов Иннокентий Петрович кэриэһигэр бастакы Өрөспүүбүлүкэтээҕи көҥүл тустуу турнирыгар муһуннулар.
Ол курдук, ыаллыы олорор Мииринэй оройуонун Айхал бөһүөлэгиттэн, Сааскылаахтан, Өлөөн түөрт нэһилиэгин көҥүл тустуунан дьарыктанар спортсменнар параадтаан киирдилэр, бүгүн күнү толору тустан күөн көрсүөхтэрэ. Турнир арыллыытыгар Өлөөн оройуонун баһылыгын бастакы солбуйааччы А.С.Сергеев, Иннокентий Петрович төрөппүт оҕолоро Туяра, Петр Илларионовтар, тустууга сирдээбит үөрэнээччитэ Федор Син-Хой эҕэрдэ тылы эттилэр. Альгис Семенович бу турнир үгэскэ кубулуйан сылын аайы ыытыллан бара турарыгар баҕа санаатын эттэ. Оҕолорго үрдүк чыпчааллары баҕарыаҕыҥ, ким күүстээх ол кыайдын!
Надежда КОЛОДЕЗНИКОВА.