Офтальмологтар мобильнай биригээдэлэрэ Өлөөн оройуонугар кулун тутар 31 күнүттэн үлэлии сылдьаллар. Кулун тутар 31 күнүгэр медиктэр биригээдэлэрэ катарактаны суһаллык эмтииргэ ыарыһахтары талбыт. Эпэрээссийэлэр оройуон киин балыыһатыгар ыытылла тураллар. Биригээдэ састаабыгар Саха өрөспүүбүлүкэтин хараҕы эмтиир балыыһатын опыттаах быраастара- офтальмохирург быраас Иннокентий Белолюбскай уонна эпэрээссийэ медицинскэй сиэстэрэтэ Екатерина Стручкова бааллар. «Мобильнай офтальмологтар бырайыактара саҕаланыаҕыттан Саха сирин Арктика оройуоннарын олохтоохторугар ураты болҕомтобутун уурабыт. Өлөөҥҥө бүтэһик сырыыларыгар биһиги эмчиттэрбит биэс сылтан ордук анараа өттүгэр эпэрээссийэлэри, дьон харахтарын көрүүлэри ыыппыттара. Билигин эрдэттэн эпэрээссийэлээн эмтээһиҥҥэ 25 ыарыһах талылынна. Биригээдэ муус устар 2 күнүгэр диэри эпэрээссийэни оҥоруоҕа, ону таһынан көрүү-истии, консультация муус устар 6 күнүгэр диэри салҕанан барыаҕа», — диэн кэпсээтэ Саха өрөспүүбүлүкэтин хараҕы эмтиир клиническэй балыыһа кылаабынай бырааһа Иван Луцкан. Мобильнай биригээдэ наадалаах ороскуот матырыйаалларын, оборудованиеларын илдьэ кэлбиттэр. Ол кэнниттэн муус устар 11 -15 күннэригэр Аллараа Халыма оройуонун Черскэй бөһүөлэгэр, эмиэ бу ый 17-21 күннэригэр Орто Халымаҕа үлэлии бараллара былааннанар.
Хараҕы эмтиир быраастарга эпэрээссийэни ааспыт дьон маннык кэпсээтилэр, махтаннылар:-
Евдокия Васильевна Винокурова:
— Хараҕым ырааҕы үчүгэйдик көрөр этэ. Билигин иистэнэрбэр үчүгэйдик көрбөт буоллум, хараҕым мөлтөөтө. Бу кэлэн эпэрээссийээлээбиттэрэ наһаа үчүгэй, элбэх киһини эпэрээссийэлээтилэр, уопсайынан балыыһаларга экономия бөҕө, биһигини куоракка ыыттахтарына бырайыаспытын барытын төлүүллэр этэ, онтон билигин бырааска эрэ төлүүллэрэ олус экономия буолар буоллаҕа. Холобура, куоракка баран көрдөрүнэргэ, эпэрээссийэлэнэргэ ыарахан. Уопсайынан үчүгэй маннык миэстэтигэр кэлэн эпэрээссийэлииллэрэ, махтанабын оройуон балыыһатын быраастарыгар уонна кэлбит быраастарга.
Валентина Васильевна Степанова:
— 1 №-дээх ыстаадаҕа чуум үлэһитинэн үлэлиибин. Кэргэмминээн, оҕолорбунаан тыаҕа көһө сылдьабыт. Бу харахпынан хааттараммын куоракка барыахпын, бырайыас ыараханыттан саллыбытым, хата манна офтальмологтар кэлэн эпэрээссийэ оҥорбуттара олус үчүгэй. Онон кинилэргэ улахан махтал, оройуон балыыһатын кэлэктиибигэр эмиэ махтал. Бу ыарахан кэмҥэ, мобильнай быраастар кэлэллэрэ биһиэхэ олус наадалаах дии саныыбын. Өссө да маннык кэлэн, дьоҥҥо көмө оҥороллоругар баҕабын тиэрдэбин.
Надежда КОЛОДЕЗНИКОВА.