Кэнники сылларга айылҕа хайдах эрэ олус соһуччу уларыйар түгэннэрэ аһары элбээтэ. Оннооҕор урут бу эргин тыатааҕы сэдэхтик көстөр эбит буоллаҕына тыаҕа сылдьар булчуттар сыл аайы көрөр түбэлтэлэрэ баар.
Тыаҕа сылдьар дьоҥҥо ити сэрэхтээх, кутталлаах. Табаһыттар сылдьар сирдэрирнэн сиэгэн буулаан аһыыр астарын, таҥастарын да алдьаталлара көстөр. Сиэгэн сүрдээх алдьатыылаах кыыл буолар, табаны эмиэ сиир, бөрөттөн итэҕэһэ суох, күүстээх уонна өйдөөх. Тыаҕа сылдьар дьоҥҥо айылҕа уларыйыыта, кыыл-сүөл сырыыта, майгыта-сигилитэ хайдах эрэ кэнники кэмҥэ күчүмэҕэйдэри үөскэтииһи.
Кэккэ сылларга халлаантан ардах түспэккэ улахан эбэлэр уулара уолан барар- кэлэр дьоҥҥо мэһэйдэри үөскэтэр. Олохтоохтор тыаҕа барбакка-кэлбэккэ сатамматтар. Айылҕа бэйэтэ туспа сокуоннаах, тугу оҥорорун кимтэн да ыйыппат, бүгүн уот куйаас буолуо, сарсын тобугунан кэһиллэр хаары түһэриэ. Оннук да буолааччы, от ыйыгар хаардаан соһутааччы. Маннык балаһыанньа биһиэхэ эрэ буолбатах, үгүс улуустарга тыатааҕы, бөрө дьиэ кыылларын, ынаҕы, сылгыны саба түһэн тутара күннээҕи көстүү, буолуохтаах курдук. Хаһан эрэ бастаан манна көстөллөрүн саҕана соҕуруу улуустарга уот баһаардара буолаллар, ол иһин бу диэки кэлэллэр диэн элбэх киһи тойоннообута. Оннук да буолара буолуо. Ирбэт тоҥноох хоту сир уокка, баһаарга былдьанан истэҕин аайы сирбит сылыйан харыстыыр ото-маһа аҕыйаан тоҥ дьапталҕа ирэрэ түргэтиир чинчилээх.
Онон сиргэ, айылҕаҕа ураты харыстабыллаахтык сыһыан наада диэн этэбит, суруйабыт. Ол үрдүнэн ойуур баһаардара сылын аайы төһө иэннээх сири сииллэрин, төһө хооромньу тахсарын ойуур хаһаайыстыбатын, ыксаллаах быһыы-майгы үлэһиттэрэ уонна да атыттар билэр буолуохтаахтар. Манан туһаайан этиэхпин баҕарабын, тыаҕа барар, сылдьар дьон, ыччаттар туох баар быраабылалары тутуһан, бэйэ кэнниттэн отууламмыт сири кичэллээхтик көрөн, уот күөдьүйэн тахсар сибикитэ суох буолуор диэри уунан саба кутан баран биирдэ салгыы айанныылларыгар. Алдьаммыт айылҕа чөлүгэр түһэригэр уһун сыллар бараналларын өйдүүр наада.
Надежда КОЛОДЕЗНИКОВА