Төлүүр дуо?
— Биэнсийэ тэрилтэтэ таксыынан айаны төлүүр дуо? Холобура, Владивосток-Дьокуускай эҥин диэни. Баҕар, сиринэн сынньана барыахпыт диэн ыйытабын.
Өлөөн олохтооҕо.
Ыйытыыга Арассыыйа Социальнай пуондата маннык хоруйдаата:
— Төлөнөр. Айаннаабыккыт туһунан докумуон (билиэт) уонна бары реквизиттээх каасса чегэ ирдэнэр.
Больничнайынан төлөбүр ылыахтара дуо?
— Саха сиригэр бэйэ дьарыктаах (самозанятые) дьон төлөнөр босуобуйаны ылыахтарын сөп дуо?
Ыйытыыга Арассыыйа Социальнай пуондата (СФР) маннык хоруйдаата:
— Кырдьык, 2026 сылтан Саха сирин бэйэ дьарыктаах дьоно саҥа быраабынан туһанар кыахтаахтар. Ол курдук, кинилэр больничнай илииһинэн төлөбүр ылар буолуохтара.
Маннык төлөбүрү ылар туһугар Арассыыйа Социальнай пуондатын (СФР) Саха сиринээҕи салаатыгар баҕа өттүнэн страховкаланар туһунан сайабылыанньа биэриэхтээххит. Бэйэ дьарыктаах киһи усунуоһун 6 ыйтан аччыгыйа суох кэмҥэ быыстала суох төлүөхтээх. Больничнай кээмэйэ страховой ыстааскыттан, усунуоһуҥ кээмэйиттэн уонна төһө уһуннук төлөөбүтүттэн тутулуктанар.
Усунуостары төлөөн баран, сыл аҥарын устата бу киһиэхэ 70 бырыһыан кээмэйдээх босуобуйаны ылар бырааптанар, оттон 12 ыйа туоллаҕына – страховой суума 100 бырыһыанын кээмэйдээҕи.
Усунуос тарыыба талыллыбыт страховой сууматтан 3,84 % тэҥнэһэр. Усунуостары ый аайы эбэтэр сыл иһин биирдэ толору төлүөххэ сөп. Өскөтүн бырагыраама кыттыылааҕа 35 тыһыынча солк. страховой сууманы талбыт буоллаҕына, кини ыйдааҕы төлөбүрэ 1344 солкуобайга тэҥнэһиэҕэ, оттон сыллааҕы төлөбүрэ 16128 солкуобайга. 50 тыһыынча солкуобайдаах страховой сууманы таллахха сылга ыйдааҕы төлөбүр 1920 солкуобайга тэҥнэһиэҕэ, оттон сыллааҕы төлөбүр – 23040 солкуобайга.
Кэлэр өттүгэр суумалар киһи тиийинэн олорор кээмэйигэр сөп түбэһэр гына индексацияланыахтара.
Манна даҕатан эттэххэ, Саха сиригэр тохсунньу ый саҕаланыаҕыттан идэлэринэн (профессиональный) нолуогу төлөөччү 20 тахса бэйэ дьарыктаах киһи быстах кэмҥэ үлэлиир кыаҕа суох буолууттан баҕа өттүнэн страховкаланыы бырагырааматыгар кыттарга сайабылыанньа биэрбитэ.
Больничнайдар ыалдьыы, эчэйии, дьиэ кэргэн ыарытыйар киһитин көрүү иһин уо.д.а. төлөнүөхтэрэ. Маныаха гражданин үлэ дуогабардаах эрээри, бэйэтэ дьарыктаах буоллаҕына, бу бырагыраамаҕа кыттыбат. Тоҕо диэтэххэ, үлэни биэрээччи босуобуйа ааҕыллар усунуоһу кини туһугар төлүүр.
Бырагыраамаҕа киирэр туһунан сайабылыанньаны тэйиччиттэн олорон “Мой налог” сыһыарыынан эбэтэр госөҥө порталын нөҥүө биэриэххэ сөп, ону тэҥэ Арассыыйа Социальнай пуондатын эрэгийиэннээҕи салаатын килийиэннэри кытта үлэлэһэр ханнык баҕарар сулууспатыгар тиийэн.
Бэйэ дьарыктаах дьон баҕа өттүнэн страховкаланыыларын эспэримиэнэ 2028 сыл бүтүөр диэри ыытыллыаҕа.
Күндү Өлөөн улууһун олохтоохторо! Бу тиэмэҕэ ыйытыылаах буоллаххытына, биир кэлим контакт-кииҥҥэ эрийиҥ: 8-800-100-00-01.
Бэлэмнээтэ Женни Стрюкова.