Саха сиригэр Ийэ күнүн чэрчитинэн ыытыллар тэрээһиннэртэн биирдэстэрэ Кирбэй нэһилиэгин ийэлэрэ Г.В. Николаева аатынан «Илькээни» сынньалаҥ киинигэр маастар-кылаастар ыытылыннылар.
Эдэр ийэлэр киистэн бэргэһэ, тыстан оҕо этэрбэһэ тигэргэ, оҕуруонан киэргэл оҥорорго, өбүгэ саҕаттан туттуллар иҥииринэн сабы хатыыга маастар-кылаастарга түмүстүлэр. Бэйэлэрэ дьиэлэригэр бэлэмнэммит тыстарын, тириилэрин имиттэн кэлэн иистэнэ үөрэннилэр. Маастар-кылаастары маастар иистэнньэҥнэр Розалия Томская, Саргылана Матвеева, Мария Егорова, Надежда Колодезникова оҥордулар. Ону кытта иистэниэн баҕалаах ийэлэр нэмиэттэри оҥоһуннулар.
Бары тутан, хабан илиилэрин үөрэттилэр, иис ымпыгын-чымпыгын, таба сиһин иҥиириттэн саамай бөҕө сабы хатыыны илэ харахтарынан көрөн, тиистэринэн сыыйан намылыттылар. Кыргыттар да хаалсыбатылар, бары иистэниэхпит диэн бигэ санаалаах тарҕастылар. Киһи киһиттэн үөрэнэр, киһи сатаабата суох, онон маннык уоппут атастаһар, мустан олорон элбэҕи оҥоруохха сөп.
Таба сиһин иҥиирин табаны сүлэргэ иэнин этигэр ыыталлар, онтон этиттэн биир да утаҕы быспакка сыыйан ыллахха эрэ сап буолар утаҕа сатанар. Маннык сүбэлэри ийэлэр уолаттарга сиһилии үөрэтээччилэр.
Бу тэрээһин «Ийэ мичээрэ» дьахтар сэбиэтин салайааччыта Тамара Томская көҕүлээһининэн ыытылынна, тэрээһини өйүүр, сэҥээрэр дьахталлар, эдэр ийэлэр кэккэлэрэ кэҥээн иһэриттэн сүргэбит үөрэр, санаабыт сырдыыр.
Надежда Колодезникова