“Манчаары Оонньуулара” спорт төрүт көрүҥнэригэр XXII Спартакиада тэрийэр кэмитиэтэ Оонньуулар спортивнай бырагырааммаларын бигэргэттэ. Саха Олимпиадата от ыйын 7-13 күннэригэр Таатта улууһугар ыытыллыаҕа. Күрэхтэһиилэргэ өрөспүүбүлүкэ бары муннуктарыттан 1772 спортсмен кыттыыны ылыаҕа.
Спартакиада бырагыраамматыгар 11 спорт көрүҥэ киирэр: хапсаҕай, мас-рестлинг, сахалыы ыстаҥа, чэпчэки атлетика, саха төрүт многоборьета, хотугу многоборье, буулдьанан ытыы, хабылык уонна хаамыска, гиирэ спорда, оҕунан ытыы уонна ат сүүрдүүтэ. Оонньуулар кэмнэригэр күрэхтэри таһынан, спорт төрүт көрүҥнэрин сайыннарыыга туһуламмыт араас научнай конференциялар уонна семинардар ыытыллыахтара.
Спартакиадаҕа хапсаҕай күрэҕэр 272 бөҕөс кыттара күүтүллэр, гиирэ спордугар 134 кыттааччы, мас-рестлиҥҥэ 350 мадьыны кыттыаҕа. Маны таһынан, сахалыы ыстаныыларга 240, чэпчэки атлетикаҕа 192 спортсмен чулуулары быһаарсыахтара. Саха төрүт уонна хотугу многоборьеларга 80-нуу кыттааччы күүтүллэр. Хабылык уонна хаамыска көрүҥэр 112 оонньооччу кыттыаҕа, ат сүүрдүүтүгэр 120 киһи.
Спартакиада араас тэрээһиннэригэр уопсайа 7000 тахса киһи кыттыаҕа.
“Манчаары оонньуулара” спорт төрүт көрүҥнэригэр XXII Спартакиада спортивнай бырагыраамматын сүрүн түһүмэхтэрэ.
От ыйын 7 күнэ.
Кыттааччылар кэлэр күннэрэ.
От ыйын 8 күнэ.
XXII Спартакиада үөрүүлээх арыллыыта. Хотугу многоборье, булдьанан ытыы, гиирэ уонна оҕунан ытыы көрүҥнэргэ күрэхтэр саҕаланыылара.
От ыйын 9 күнэ.
Сүрүн күрэхтэр саҕаланыылара, ол иһигэр, мас-рестлинг, чэпчэки атлетика уонна сахалыы ыстаҥа көрүҥнэргэ.
От ыйын 10 күнэ.
Хабылык, хаамыска уонна хапсаҕай көрүҥнэргэ күрэхтэр саҕаланыылара. Мас-рестлиҥҥэ, чэпчэки атлетикаҕа уонна сахалыы ыстаҥаларга финаллар.
От ыйын 11 күнэ.
Саха төрүт многоборьетын көрүҥэр күрэх саҕаланыыта, хотугу многоборьеҕа күрэх салҕаныыта. Хапсаҕай, хаамыска уонна хабылык көрүҥнэргэ финаллар.
От ыйын 12 күнэ.
XXII Спартакиада үөрүүлээх сабыллыыта уонна кыайыылаах хамаандалары наҕараадалааһын.
От ыйын 13 күнэ.
Спартакиада кыттыылаахтарын барар күннэрэ.