Ахсынньы 21 күнүгэр Өлөөн сэлиэнньэтин А.С.Иванов аатынан “Илкит” этно-култуура Киинигэр оҕолор ортолоругар «Сердце отдаю детям» диэн Черкаева Евдокия Васильевна сырдык кэриэһигэр анаммыт хоһоон ааҕыы күрэҕэ ыытылынна.
Бу бырайыак ааптарынан Евдокия Васильевна төрөппүт кыыһа Елена Васильевна Христофорова – Черкаева буолар. Бу күрэх сыала — билиҥҥи көлүөнэ, кэлэр кэнэҕэски ыччат Ийэ үрдүк аатыгар сүгүрүйүүтүн ситиһии, чугас дьоҥҥо тапталы, убаастабылы, дьиэ-кэргэн сыаннастарын иҥэрии, көлүөнэлэр быстыспат ситимнэрин олохтооһун, оҕолор дьоҕурдарын сайыннарыы.
Евдокия Васильевна Черкаева Өлөөн оройуонун биир бастыҥ элбэх оҕолоох ийэтэ, эбээтэ. Дьоҥҥо-сэргэҕэ убаастанан, тапталлаах чугас да дьонугар «Эбээ Дуунньа» этэ. Евдокия Васильевна дьоҥҥо үтүө сыһыаннаах, элэккэй майгылаах үтүө үлэһит, хаһаайка этэ.
Биллэн туран Ийэ… Орто дойдуга кэлиэхпититтэн, олохпут устата биһиэхэ аргыс буолар, күн сирин үтүөтүн көрдөрбүт, олох киэҥ аартыгар үктэннэрбит күндү, күн тэҥэ киһибит буолар.
Евдокия Васильевна сылаас тыыныгар, тапталыгар, мындыр өйүгэр, олох араас эндирин аахсыбакка үөрэр-көтөр, эрэли саҕар дьоҕуругар сүгүрүйэн туран, Лена Васильевна Ийэтин сырдык кэриэһигэр анаан ыыппыт хоһоон ааҕыытын күрэҕэ быйыл 2-с төгүлүн үрдүк таһымнаахтык ыытылынна.
Быйылгы күрэх биллэр биричиинэлэринэн дистанционнай форматынан ыытылынна. Уопсайа 39 оҕо кыттыыны ылан, бэйэлэрин дьоҕурдарын Дьүүллүүр сүбэ иннигэр таһаардылар. Дьүүллүүр сүбэҕэ үлэлээтилэр: Николаева Е.В. — кииннэммит бибилэтиэкэ дириэктэрэ, Стручкова А.А. — үөрэҕирии бочуоттаах бэтэрээнэ, Өлөөн орто оскуолатын алын кылаас салайааччыта, Карпова М.Н — бибилэтиэкэр.
Биэчэри бырайыак ааптара Елена Васильевна уонна оҕо модельнай бибилэтиэкэтин үлэһитэ Юрий Юшкевич иилээн-саҕалаан ыыттылар.
Сиэннэр барахсаттар эбээлэргэ, эһээлэргэ болҕомтолоох, өрүү үөрдэ-көтүтэ сырыттыннар, үтүө сиэрдээх-майгылаах дьон буола улаатыахтара диэн эрэнэбит.
Куонкурус сыалын ситтэ, кыайыылаахтар ааттаннылар.
Оскуола иннинээҕи саастаах уһуйаан оҕолоругар:
1 миэстэ — Муксунов Алтын
2 миэстэ — Федорова Снежанна
3 миэстэ — Типянова София
1- 4 кылаас оҕолоро:
1 миэстэ — Иванова Адья
2 миэстэ — Тимофеев Леонид
3 миэстэ — Иванова Амелия
5-8 кылаас оҕолоро:
1 миэстэ — Христофоров Андрей
2 миэстэ — Толбонова Милана
3 миэстэ — Кычкин Матвей
Күрэх Кылаан кыайыылааҕын аатын Дьүүллүүр субэ Кладкина Алгыстаанаҕа иҥэрдэ, көрөөччүлэр биһирэбиллэрин 4 саастаах Харабаев Эрсан ылыаҕын ылла.
Бу тэрээһин спонсордарынан Евдокия Васильевна Черкаева төрөппүт оҕолоро, Анна Кириллина буоллулар. Күрэҕи тэрийсибит Өлөөннөөҕү кииннэммит бибилэтиэкэ, А.С.Иванов аатынан «Илкит» этно-култуура Киинин үлэһиттэригэр барҕа махтал тылларын тиэрдэбит.
Валентина Гаврильева