— Саха сирин курдук тымныы дойдуга олорор дьоҥҥо тыс этэрбэс диэн олус суолталаах таҥаспыт буоллаҕа. Таба кур тыһыттан этэрбэс тигиэххэ сөп дуо?
Ыйытыыга Өлөөн улууһун Харыйалаах иистэнэр сыаҕын сэбиэдиссэйэ Розалия Томская маннык эппиэттээтэ:
-Таба кур тыһа диэн өр сыппыт тыс. Эмиэ хайдах хараллан сыппытыттан тутулуктаах. Кур аата кур. Сылааһы үчүгэйдик туппат диэххэ сөп. Ол иһин табаһыттарга, булчуттарга, быһата, ыраах айаҥҥа, сырыыга сылдьар дьоҥҥо туһата кыра. Оттон куоракка, дэриэбинэ иһигэр кэтэргэ барсар. Тыскытын имитэргитигэр эмиэ болҕойуҥ. Аһары хаппыт буоллаҕына, сиигирдэ-сиигирдэ сугатын ылаҕыт. Син-биир эмэҕинэн имитэр ордук. Баҕар, сорох киһи эмэх диэн тугун билбэтэ буолуо. Онно быһаардахха, мас иһэ эмэҕирэн, эмэх буолар. Бороһуок курдук буолар, үлтүрүйэн. Ону биһиги иистэнньэҥнэр кыһыл эмэх диэн ааттыыбыт.
Женни Стрюкова бэлэмнээтэ