Бу дьыл Саха Өрөспүүбүлүкэтин баһылыга Айсен Николаев сорудаҕынан, култуура, өй-санаа сыаннастарын харыстыыр, дойдуга бэриниилээх буоларга уһуйууну уонна төрүт тыллары көмүскүүр сыалтан муниципальнай бибилитиэкэлэргэ социальнай суолталаах киниигэлэри туттарыы сөргүтүлүннэ. Ол туһунан Саха сирин официальнай портала кэпсиир.
Ол курдук, ааспыт нэдиэлэҕэ, Өлөөҥҥө сыа балык бырааһынньыгын саҕана Ил Дархан үлэтин сырыытынан кэлэ сылдьан, бастакынан Өлөөннөөҕү бибилитиэкэ ситимигэр социальнай суолталаах киниигэлэри туттарбытын туһунан, кылгастык, кэпсээн турардаахпыт.
Үөрүүлээх түгэн туһунан бэйэтин тус санаатынан оройуоннааҕы бибилитиэкэ дириэктэрэ үллэһиннэ
- Биһиги Өлөөммүт бибилитиэкэтин кыраайы үөрэтэр пуондатыгар эбии киниигэлэр киирбиттэринэн үөрүүбүт олус улахан. Билигин киниигэлэри ылан дьаһанан, нэһилиэктэрбитигэр баар биэс бибилитиэкэбитигэр тарҕатыахпыт. Ол кэннэ, ааҕааччыларбыт тута кэлэн көрүөхтэрин-билсиэхтэрин сөп. Маннык социальнай суолталаах киниигэлэр өрөспүүбүлүкэ бибилитиэкэлэринэн 27000 киниигэ түҥэтиллиэхтээх — диэтэ Екатерина Васильевна Николаева.
Маны тэҥэ, 72 экземпляр социальнай суолталаах оҕо национальнай литэрэтиирэтин Айсен Николаев Өлөөн оройуонун үөрэҕириитин управлениетыгар туттарбыт.
- Айсен Сергеевич Николаев Өлөөҥҥө кэлэ сылдьан үөрэх салаатын салайааччыларын, үлэһиттэрин кытта көрсүһүүтүгэр, кэлэр үөрэх сылыгар анаан-минээн 72 экземпляр социальнай суолталаах литэрэтиирэни туттарда. Бу киниигэлэр биһиги Сахабыт сирин Бичик издательствотын айар-тутар киниигэлэрэ буолаллар. Балаҕан ыйын бастакы күнүттэн үөрэҕирии салаата саҥа федеральнай бырагыраамаҕа (нууччалыы ФОП) киириэхтээх. Бу киниигэлэргэ ордук саха суруйааччыларын кэпсээннэрэ, айымньылара, хоһоонноро, остуоруйалара уонна да атын араас жанрдара киирэ сылдьаллар. Онон, оскуолаҕа да, уһуйааҥҥа да оҕолор өй-санаа, эт-хаан өттүнэн сайдалларыгар, билиини дириҥник ылыналларыгар олуһун диэн наадалаах буолуо диэн бигэ эрэллээхпит — диэн үөрэҕирии салаатын методиһа Варвара Петровна Николаева кэпсээтэ.
Социальнай суолталаах киниигэлэр, Саха сирин култууратын сайдыытыгар аналлаах судаарыстыбаннай бырагыраамаҕа көрүллэр субсидиянан бэлэмнэнэн тахсан тарҕатыллаллар. Бу субсидия сылтан сыл аайы улам үрдээн иһэрэ биллэр эбит. Ол курдук, бырагыраама олоххо киириитин саҕана 2019 сыллаахха 16,25 мөлүйүөн көрүллүбүт эбит буоллаҕына, быйыл (2023 сылга) – 20,8 мөлүйүөҥҥэ тиийбит.