Бу ый 2 күнүгэр Кирбэй нэһилиэгэр бэлиэ күн буолла, ол курдук, Христофоров Х.А. аатынан Харыйалаах орто оскуолатын иһинэн “Арктика” үлэһит каадыры бэлэмниир киин “Мастер по изготовлению швейных изделий” орто үөрэх арыллыытын дьоро күнэ буолла. Алгыс тылынан Күн Нуурал Хотун Аал уот уматан алгыһынан айхаллаата. Үөрэх арыллыытыгар Харыйалаах орто оскуолатын дириэктэрэ Христофор Павлович Васильев, Өлөөн улууһун үөрэҕирии салаатын салайааччыта Мария Христофоровна Иванова, Кирбэй нэһилиэгин баһылыгын солбуйааччы Марианна Михайловна Егорова эҕэрдэлээтилэр. Куйаар ситиминэн Арктика киин үөрэтэр-методическай үлэҕэ дириэктэри солбуйааччы Оксана Алексеевна Андросова эҕэрдэлээтэ. Маннык үөрэх төрүт олохтоохторго наадатын чопчу тоһоҕолоон эттэ уонна ситиһиилэри баҕарда. Орто үөрэххэ үөрэнэн өбүгэ дьарыга иис-уус тарҕанан, кэҥээн норуокка туһаны аҕалыахтаах. “Арктика” үлэһит каадыры бэлэмниир киин Харыйалаах оскуолатын иһинэн орто үөрэх арыйан баҕалаахтары үөрэтэргэ диэн сөбүлэҥин биэрэн күн бүгүн студеннар үөрэнэн саҕалаатылар.
Иис суолтата тус хоту олохтоох дьоҥҥо олохпут укулаатын, бэйэбит айылҕабытынан уратыбытын көрдөрөр. Билигин баарбытын бөҕөргөтөн, саҥалыы сайыннаран ону өссө харыстаан, харайар биһиэхэ олус наада. Улаатан иһэр кыыс оҕолорго иис суолтатын билэллэригэр, инники олохторугар үлэ булалларыгар туһалаах буолуоҕа. Онон бу үөрэх эдэрдэргэ, аҕам саастаахтарга даҕаны олоххо дьарыктаах буолалларыгар элбэх туһаны биэриэ диэн эрэнэбит. Бу үөрэххэ 10 студент үөрэнэрин туоһулуур билеттэри оскуола дириэктэрэ Христофор Васильев үөрүүлээх быһыыга-майгыга туттарда, саҥа үөрэх кыыһатын үөрэнээччилэрэ хардатын студеннар гимнэрин ыллаатылар.
Харыйалаах орто оскуолатын дириэктэрэ Христофор Павлович – “бу үөрэххэ үөрэтии билиҥҥи кэмҥэ суолтата улахан, туох баар урукку дьоммут үлэлэрэ, иистэрэ-сатабыллара, мындырдаан айбыт туттар оҥоһуктара сүтэн-симэлийэн хаалбакка эбиитин ыччат дьон сатыыр буолан күннээҕи олохторугар тутталларыгар олук буолуохтаах. Биир тирииттэн, тыстан саҕалаан айар-тутар дьоҕур, норуотун духуобунай баайын иҥэринэн киэн туттуу өйдөбүлэ бу үөрэххэ үөрэннэхтэринэ бигэтик иҥиэҕэ” -диэн дириҥ ис хоһоонноох баҕа санаатын тиэртэ. Харыйалаах орто оскуолатын тохсус кылааһын туйгуннук үөрэнэн бүтэрбитин туоһулуур аттестаты (аттестат с отличием) Куулар Айсланаҕа туттарда, оскуола олоҕор аһары үчүгэй сонун. “Осикта” образцовай оҕо ансаамбыл бөлөҕүн кыргыттара хотугулуу тыыннаах үҥкүүнэн эҕэрдэлээтилэр. Үөрэх технология кылааһыгар ыытыллар, технология уруогун учуутала Елена Андреевна Васильева араас сылларга үөрэммит оскуола үөрэнээччилэрин оҥоһуктарынан быыстапка тэрийэн үлэлэр ис хоһооннорун кэпсээтэ, Христина Афанасьевна туһунан презентация көрдөрдө.
Дьоро күн үөрүүлээх түгэнинэн Саха өрөспүүбүлүкэтигэр Норуот Маастара, Арассыыйа художниктарын Сойууһун чилиэнэ, Саха өрөспүүбүлүкэтин культуратын үтүөлээх деятелэ, Өлөөн эбэҥки национальнай оройуон Бочуоттаах гражданина Христина Афанасьевна Бенчик аатын Харыйалаах орто оскуолатын технология кылааһыгар иҥэрии чааһа буолла. Христина Афанасьевна үлэтин сыаналаан, айбыт ииһинэн оҥоһуктарын үйэтитэн кылааска иҥэрии саамай тоҕоостоох. Эбэҥки норуотун төрүт дьарыгын сүтэрбэккэ күн баччаҕа диэри үлэлии турар иистэнэр сыаҕы салайан эдэр көлүөнэ кыргыттарга наставниктаабыт талааннаах салайааччы Христина Афанасьевна араас таһымнаах быыстапкаларга, күрэхтэһиилэргэ кыттан Өлөөнү аар саарга ааттаппытынан киэн туттуу бэлиэтэ буолар.Кини хаартыскатын кылаас ааныгар арыйыы сиэрэ-туома оҥоһулунна, кини үлэтигэр-хамнаһыгар сүгүрүйүү буолар диэн туран аймахтара Людмила Владимировна Бенчик, кийиитэ Полина Кононовна Николаева махтаннылар, эҕэрдэлээтилэр, суруйбут кинигэтин методическай ыйынньык быһыытынан туһаналларыгар анаан бэлэхтээтилэр. “Арктика” үлэһит каадыры бэлэмниир киин орто үөрэҕэр үөрэнэ сылдьар студеннарга ситиһиилэри, өссө кэҥээн элбэх ыччат өбүгэ ииһин баһылаан олохторугар туһалаах дьарыктаах буолуохтуннар!
Надежда КОЛОДЕЗНИКОВА