Үөрэх бастакы чиэппэрин бүтэһик нэдиэлэтин, Күннээх Ээйик орто оскуолатын 8-11-с кылаас ыччаттара көрдөөх-нардаах, олус туһалаах тэрээһиннэргэ кыттан атаардылар.
Ол курдук, уол оҕону үлэҕэ, бултка сыһыарыы, үөрэтии хайысхатынан салайтаран — технология учуутала Петров Михаил Владимирович уонна физкультура учуутала Иванов Марислав Вячеславович — «Арбанда» эбэ күөлгэ ойбону тэһиигэ, илим түһэриитэгэр, көрүүтүгэр уонна да илимнээһин атын албастарыгар үөрэхтээһин ыытылынна.
Бултуйбут бултарын, балыктарын оскуола оҕолоро үөрэ-көтө олохтоох ытык кырдьаҕастарыгар, аҕам саастаахтарга күндүлээн үөртүлэр.
Маны тэҥэ улахан кылаас уолаттара оскуола үлэһиттэрин, учууталларын кытары муус ылыытыгар үлэлээн көмөлөстүлэр.
Инньэ гынан, инники кэскиллэрбит, уолаттарбыт инникитин үлэҕэ – бултка барытыгар сыһыаннаах, байанайдаах хоһууттар буола улаатыахтара диэн эрэнэбит.
Кэрэчээнэ Тарбахова.