Быйыл Өлөөн өрүс ыам ыйын ортотугар муус үрдүнэн хаар уутун халытан кыдьымаҕы уһуннаран баран, хаар ууллан биэрбэккэ уу киириминэ, харан турда.
Халлаан төһө да сөрүүн турдар систэр хаардара ууллан, үрүйэлэр ууларын сүүрүгүрдэн уу эбиллэн мууһун көтөҕөн көмүөллээн ыраастанна. “Һуу” диэбиттии налыччы устан налытар.
Кирбэй олохтоохторо саас кэлиитин Ньукуолун күнүн эбэҥкилии Бакалдын ыытыллар, сиэр-туом оҥоһуллар ытык сиригэр, саҥа дьыллыыр арааммытыгар көрүстүбүт. Халлаан да туран биэрэн, көрсүһүүбүт бэрт тэрээһиннээхтик ааста.
“Сааскы киһи салбаммытынан, күһүҥҥү киһи күлбүтүнэн” диэбиккэ дылы кус, хаас кэлиитэ хайа баҕарар эр киһиэхэ күүтүүлээх кэм буоллаҕа. Ол сиэринэн сааһыт, булчут уолаттарбыт өттүк харалаах сылдьаллар, Ньукуолун күнүгэр мустубут олохтоохторго бастакы хаастарын, кустарын кыргыттарга ким хайдах сатаан астыырынан буһартаран амсаттылар. Бэйэ оҥорбут лапсалаах хаас итии миинэ, үөлүллүбүт кус, духуопкаҕа буспут хаас остуол хотойорунан уурулунна. Асчыт кыргыттарга, ийэлэргэ махталбытын тиэрдэбит.
Тэрээһин иккис чааһынан хамаандаҕа арахсан көрдөөх оонньууларынан, эҕэрдэ ырыанан, хомус дьүрүскэн тыаһынан арыалланна. Буоларын курдук, түмсүүлэр, түөлбэлэр оҕолордуун кыттан астынныбыт, сүргэбит үөрдэ. Олохтоох сынньалаҥ киин үлэһиттэрэ, олохтоох дьаһалта, оскуола-саад кэлэктииптэрэ олохтоохтору кытта бииргэ түмсэн, сүбэни холбоон сайыны сэргэхтик көрүстүбүт.